Qyzylordalyq ǵalymdar kúrish qaýyzynan kremnıı dıoksıdin alý tehnologııasyn jasady
2022 jylǵy 17 qańtar 09:50

Qyzylordalyq ǵalymdar kúrish qaýyzynan kremnıı dıoksıdin alý tehnologııasyn jasady

QYZYLORDA. QazAqparat - Qorqyt ata atyndaǵy Qyzylorda ýnıversıtetiniń ǵalymdary kúrish qaýyzynan bıochar, kremnıı dıoksıdin alý tehnologııasyn jasady, dep habarlaıdy QazAqparat Bilim jáne ǵylym mınıstrligine silteme jasap.

Buryn egin jınalyp, dándi óńdegennen keıin myńdaǵan tonna kúrish qaýyzy paıdalanylmaı, órteletin. Ǵalymdardyń arqasynda kúrish qaýyzy men sabanynan qaǵaz, belsendirilgen kómir jáne bıochar ázirlenip jatyr. Bıochar álemde topyraq qasıetin jaqsartyp, onyń tuzdylyǵyn aıtarlyqtaı tómendetetin bıotyńaıtqysh retinde keńinen qoldanylady.

«Kremnıı dıoksıdi shyny, keramıka, abrazıv, betondy jabdyqtar, tis pastasy, kosmetıka, optotalshyq jáne t.b. óndirisinde qoldanylady. Ádette kremnıı dıoksıdin qumnan alady, biz kúrish qaýyzynan, ıaǵnı qaldyqtan alý tehnologııasyn jasadyq. Kúrish qaýyzyn maıdalap, keptirip, mıkrotolqyndyq sáýlelendirý jaǵdaıynda tuz qyshqylymen óńdeımiz. Osylaısha beıorganıkalyq qospalardy bólip alý úderisin jyldamdatyp, kúrish qaýyzyn mýfeldi peshte satylap 300 ºS-dan 800 ºS-ǵa deıin kúıdiremiz. Nátıjesinde tazalyǵy 100 % kremnıı dıoksıdi alynady», – dedi Qorqyt ata atyndaǵy Qyzylorda ýnıversıtetiniń professory N.O.Appazov.

Ǵalymdar óńirde jetip artylatyn kúrish qaýyzyn qoldanýdyń basqa da ratsıonaldy joldaryn izdestirip jatyr.



Seriktester jańalyqtary

Jańalyqtar

Úrdis

MURAǴAT