+7 (701) 759 90 19
USD 443.50 EUR 479.47
RUB 5.79 CNY 62.51
Jańalyqtar

Qyzylordalyq Elena Pak Abaıdyń 200-ge jýyq óleńin jatqa biledi

2020 jylǵy 19 qańtar 09:30
Bólisińiz:
Qyzylordalyq Elena Pak Abaıdyń 200-ge jýyq óleńin jatqa biledi

QYZYLORDA. QazAqparat - Qyzylordalyq stýdent Elena Pak qazaqtyń uly oıshyly Abaıdyń óleńderin jatqa biledi. Alashtyń ardaqty tulǵasynyń shyǵarmashylyǵyna erekshe qyzyǵýshylyq tanytqan jas kóptegen baıqaýda jeńimpazdar qataryna kórindi, dep habarlaıdy QazAqparat tilshisi.

Elena 2001 jyly Shıeli aýdanyna qarasty Aqmaıa aýylynda dúnıege kelgen. Aqmaıada kóptegen ult ókilderi tatý-tátti ǵumyr keship otyr. Solardyń qatarynda Pak áýleti de bar. Uzaq ýaqyttan beri oys aýylda turatyn bul áýlet jergilikti jurtpen etene aralasyp, eldegi aǵaıynmen dos-baýyrdaı bolyp ketti. Bereke men birlik uıa salǵan shýaqty shańyraqtaǵy barlyq adam qazaq tilin jetik biledi. Halqymyzdyń maqal-mátelin, beıneli sózderin, ózge de ereksheligin bir kisideı túsinedi.

«Kezinde atam Vıtalıı Pak aýylda kúrishshi bolyp eńbek etse, ájem Svetlana Lıan esepshi qyzmetin atqardy. Qazir ekeýi de zeınetker. Ákem Vladımır men anam Tatıana da sol qutty qonysta turaq tapty, búginde «Aqmaıa» sharýashylyǵynda nesibesin terip júr. Otbasynda úsh balamyz. Úlkeni – menmin, inim Vıtalıı de qazaq aqyn-jazýshylarynyń shyǵarmalaryna qyzyǵady. Ol da Abaıdyń birshama óleńin jatqa biledi. Bıyl elimizde kemeńger tulǵanyń 175 jyldyǵyn keńinen atap ótý josparlanyp otyr. Biz mereıtoı barysynda zerdemizge taǵylymdy oı túıerimiz sózsiz», - dedi Elena.

Ol aýylda qazaq mektebinde bilim aldy. Es bilgennen sol tilde sóılegen jas óren bilim uıasynda eshbir qıyndyq kórgen joq. Kúnde ózimen oınap júrgen dostary sekildi árbir sabaqta óziniń qabiletin kórsetip, zerdesine toqyǵan dúnıelerdi ustazyna emin-erkin jetkize alatyn. Ájesi Svetlana nemeresiniń qolynan jetektep qazaq mektebine alyp barǵan edi. Táýelsiz elimizdiń erteńi – qazaq tilinde ekenin jete túsingen shańyraq ıeleri qarııanyń oraıly pikirine eshbir qarsy bolǵan joq. Bilimge qushtar jetkinshek osylaısha ulan-ǵaıyr dalanyń tereńnen tartqan tarıhyna boılap, qanshama tolymdy týyndy, jyr marjanymen sýsyndap ósti. Darhan dalanyń danasy Abaı óleńderine degen qyzyǵýshylyq ta sol mektep qabyrǵasynda júrgende oıandy.

«Toǵyzynshy synypta oqyp júrgen kezim edi. Eń alǵash Abaı atamyzdyń óleńderine degen qyzyǵýshylyǵymdy oıatqan ustazym Bıbigúl Sultanova maǵan «Abaı oqýlary» baıqaýy bolatynyn aıtty. Soǵan qatysýǵa shaqyrdy. Men odan eshbir júreksingen joqpyn. Ázirlik jasaýdy bastap kettik. Bas-aıaǵy úsh-aıdyń kóleminde Abaıdyń 80-ge tarta óleńin jattadym. Aýdandyq baıqaýda eńbegim joǵary baǵalanyp, birinshi oryn ıegeri atandym. Odan keıin oblystyq baıqaýǵa deıin uly aqynnyń «Eskendir» poemasyn jattap aldym. Ustazym ekeýmiz ol baıqaýdan da abyroıly oraldyq», – deıdi Elena.

Búgingi kúnderi Elena Qorqyt ata atyndaǵy Qyzylorda memlekettik ýnıversıtetinde fılolog mamandyǵy boıynsha ekinshi kýrsta oqıdy. Zerek qyz til biliminiń qyr-syryna qanyǵa túsýge ynta jasap otyr. Árbir tildi jete zertteı bilseń, sol ulttyń búkil bolmys-bitimin zerdeleýge ábden bolatynyn aıtady.

Ol kóptegen qoǵamdyq sharalarǵa belsene qatysyp keledi. Oǵan qazaq tilin jaqsy biletindigi kóp kómektesedi.

Dostyq pen birlik ult tańdamaıdy. Sonaý bir alasapyran jyldarda qazaq topyraǵyna qanshama ult pen ulys qadam basty. Qadym zamannan qanymyzǵa sińgen qalpymyzdy saqtap, taǵdyr jazýymen bizdiń jerge kelgen talaı jan keńpeıil nıetimizdiń shýaǵynan qýat aldy. Qazirgi tańda egemen elimizdiń eńsesin tiktetýge olar da bizben birge qal-qaderinshe úlesin qosyp keledi. Jergilikti halyqtyń tili men dilin boıyna sińirip, olarmen týys-baýyr sekildi etene aralasyp ketti.


Bizdiń kanalymyzǵa jazylyńyz:

Basty sózder: Qyzylorda oblysy, Ádebıet, #Abai175,
Bólisińiz:

Avtor:

Ádiljan Úmbet

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Kojakeldıev E.
Kojakeldıev E.
954-059
REDAKTOR
Erbol Janat
Erbol Janat
954-059
REDAKTOR
Aıdar Ospanalıev
Aıdar Ospanalıev
954-059

MURAǴAT