Qyzylordada jol erejesin 181 márte buzǵan júrgizýshi aıyppul tóleıdi
2021 jylǵy 15 aqpan 14:41

Qyzylordada jol erejesin 181 márte buzǵan júrgizýshi aıyppul tóleıdi

QYZYLORDA. QazAqparat - Qyzylorda oblysynda 181 márte jol erejesin buzǵan jergilikti turǵyn 3,5 mln teńge aıyppul tóleıtin boldy, dep habarlaıdy QazAqparat tilshisi.

Oblystyq polıtsııa departamentiniń ákimshilik polıtsııa basqarmasynyń qyzmetkerleri, prokýratýra ókilderi jáne sot oryndaýshylary «Boryshker» is-sharasy aıasynda birlesken reıd júrgizdi.

Nátıjesinde birneshe aı ishinde jyldamdyq rejımin arttyryp, 181 márte jol erejesin buzǵan 34 jastaǵy oblys turǵyny qolǵa tústi.

Ol óziniń basqarýyndaǵy reseılik nómiri bar jeńil avtokólikpen birneshe aı ishinde jyldamdyq rejımin 181 márte buzǵan.

«Quqyq buzýshylyqty avtomatty túrde anyqtaıtyn «Arkan» qurylǵysy boıynsha avtokólikke 2020 jyldyń 12 maýsymy men 2021 jyldyń 11 aqpany aralyǵynda 3 mln 591 myń 265 teńge somasynda aıyppul salynǵan. Sondaı-aq, júrgizýshi kólikti saqtandyrý qujatsyz tek júrgizýshi kýáligimen basqarǵany anyqtaldy. Avtokólik aıyppul turaǵyna qoıyldy» dep málim etti Qyzylorda oblystyq polıtsııa departamentiniń baspasóz qyzmeti

Vedomstvo málimetinshe, quqyq buzýshy endi salynǵan aıyppuldardy tóleýi tıis.

Júrgizýshige QR Ákimshilik quqyq buzý kodeksiniń 612-baby 1-bóligimen hattama rásimdelip, jınalǵan qujattar sotqa joldandy.


Seriktester jańalyqtary

Jańalyqtar

Úrdis

MURAǴAT