Qyzylordada Tuńǵysh Prezıdent kúnine arnalǵan respýblıkalyq konferentsııa ótkizildi
2021 jylǵy 30 qarasha 17:21

Qyzylordada Tuńǵysh Prezıdent kúnine arnalǵan respýblıkalyq konferentsııa ótkizildi

QYZYLORDA. QazAqparat - Qyzylordada QR Tuńǵysh Prezıdenti kúnine arnalǵan respýblıkalyq ǵylymı-praktıkalyq konferentsııa ótkizildi, dep habarlaıdy QazAqparat tilshisi.

Búgin oblys ákimi Gúlshara Ábdiqalyqovanyń tóraǵalyǵymen «Tuńǵysh Prezıdent jáne Táýelsiz Qazaqstan: órkendeýdiń 30 jyly» atty respýblıkalyq ǵylymı-praktıkalyq konferentsııa ótkizildi.

Konferentsııaǵa QR Parlamenti Senatynyń depýtaty Murat Baqtııaruly, oblystyq máslıhat hatshysy Naýryzbaı Baıqadamov, oblystyq Qoǵamdyq keńestiń tóraǵasy Baqbergen Dosmanbetov, oblystyq ardagerler keńesiniń tóraǵasy Serik Dúısenbaev, belgili ánshi-kompozıtor Jeńis Seıdýllauly, aıtysker aqyn Muhtar Nııazov, aýyr atlet Ilıa Ilın qatysty. Sondaı-aq, atalǵan jıynǵa zııaly qaýym ókilderi, oblystyq Qazaqstan halqy Assambleıasynyń belsendileri, joǵary oqý oryndarynyń basshylary men ǵalymdary, basqarma basshylary, úkimettik emes uıym ókilderi jáne onlaın baılanys arqyly aýdan ákimderi men zııaly qaýym ókilderi keldi.

Aımaq basshysy Syr halqyn QR Tuńǵysh Prezıdenti kúnimen quttyqtap, Táýelsiz Qazaqstannyń damý belesinde Elbasynyń róli men jańǵyrý kezeńindegi Syr eliniń jetistigine toqtaldy.

«Barshańyzdy Táýelsiz elimizdiń mártebeli merekesi – Qazaqstan Respýblıkasynyń Tuńǵysh Prezıdenti kúnimen quttyqtaımyn!. Elbasy kóshbasshylyǵynyń arqasynda saıası júıesi turaqty, ekonomıkalyq áleýeti myqty, ulttyq rýhy berik, halyqaralyq bedeli zor qýatty memleketti qurdyq. Osy jasampaz isterdi Elbasynyń serigi, Prezıdentimiz Qasym-Jomart Toqaev júıeli túrde júzege asyrýda. Elimiz táýelsizdik jyldary qanshalyqty tolymdy tabystarǵa qol jetkizse, oǵan Syr eli de óz úlesin qosýda. Elbasymyz «Syr - Alashtyń anasy» dep qazaq eliniń alǵashqy astanasy Qyzylorda jaıly jyly lebizin bildirgen edi. Ekinshiden, Qyzylorda oblysy - Qazaqstanda ǵana emes álemde ǵaryshtyq keshen ornalasqan strategııalyq mańyzy bar óńir. Úshinshiden, Tuńǵysh Prezıdentimizdiń dana saıasatymen halyqaralyq sarapshylar tarapynan «Ǵasyr jobasy» atalǵan Aral teńizin saqtap qalý ıdeıasy arqyly ekologııalyq apat aımaǵy retinde tarap ketkeli turǵan oblysymyz óz ornyn saqtap qaldy. Tórtinshiden, «Batys Eýropa - Batys Qytaı» joly arqyly el men eldi, jer men jerdi jaqyndatty. Bul - barlyq aýdany temirjol men avtokólik jolynyń boıynda ornalasqan Syr óńiri úshin eń tıimdi ınfraqurylymdyq sheshim», - dedi G. Ábdiqalyqova.

Konferentsııada Murat Baqtııaruly, Naýryzbaı Baıqadamov, Baqbergen Dosmanbetov, Serik Dúısenbaev Ult kóshbasshysy Nursultan Nazarbaevtyń saıasaty týraly sóz qozǵady.

Sondaı-aq, konferentsııa barysynda oblystyq Qazaqstan halqy Assambleıasy tóraǵasynyń orynbasary, nemis etnomádenı birlestiginiń tóraǵasy Irına Shek baıandama jasady. Oǵan qosa Jeńis Seıdollauly, Muhtar Nııazov, Ilııa Ilın men Talǵat Tiles Táýelsiz Qazaqstandy qalyptastyrý jolyndaǵy azamattardyń úlesi týraly oı qozǵady.


Uqsas jańalyqtar

Jańalyqtar

Úrdis

MURAǴAT