Qyzylordada 2025 jylǵa deıin elektr qýaty 240 MVt bolatyn bý-gaz qondyrǵysy salynady
2022 jylǵy 28 mamyr 16:17

Qyzylordada 2025 jylǵa deıin elektr qýaty 240 MVt bolatyn bý-gaz qondyrǵysy salynady

QYZYLORDA. QazAqparat - Qyzylorda qalasynda 2025 jylǵa deıin elektr qýaty 240 MVt bolatyn bý-gaz qondyrǵysyn salý jobasy júzege asady, dep habarlaıdy QazAqparat tilshisi.

Bul jaǵymdy jańalyq elimizdiń Energetıka mınıstri Bolat Aqsholaqovtyń Qyzylorda oblysy turǵyndarymen júzdesýinde aıtyldy.

«Bıylǵy shilde aıynda Qyzylorda oblysynda elektr qýaty 240 MVt bolatyn bý-gaz qondyrǵysyn salýdy kózdeıtin joba boıynsha ınvestorlardy irikteý josparlanýda. Ol aýktsıondyq saýda-sattyqty ótkizýdiń bekitilgen grafıgine sáıkes júrgiziledi. Ony iske asyrýdyń boljamdy quny 215,1 mlrd teńgeni quraıdy. Paıdalanýǵa berýdiń boljamdy merzimi - 2025 jyl. Osy jobany iske asyrý 700 mln.kVt kólemindegi qazirgi tapshylyqty jabýǵa múmkindik beredi», - dedi mınıstr.

Mınıstrdiń aıtýynsha, keıingi 3 jylǵa júrgizilgen taldaý boıynsha jylý-elektr ortalyǵy jóndeý naýqanyna qarajat birkelki bólinbegen. Mysaly, 2019 jyly Qyzylorda jylý- elektr ortalyǵynda negizgi jabdyqtarǵa kúrdeli jóndeý júrgizilgen joq, Ol 2020 jyly 1,4 mlrd teńgeni qurasa, byltyr 50 paıyzǵa tómendedi.

2019-2021 jyldary 5 qazandyqqa jáne 3 gaz týrbınalyq qondyrǵyǵa kúrdeli jóndeý jumystary júrgizildi.

Jalpy, Qyzylorda oblysynyń energetıkalyq kásiporyndarynyń jumysyna áser etetin problemalyq máseleler de bar. Olardyń qatarynda negizgi jabdyqtyń joǵary tozýy, Syrdarııa ózenindegi sý deńgeıiniń tómendeýi, materıaldar men jabdyqtar qunynyń qymbattaýy, materıaldarmen jáne jınaqtaýyshtarmen jetkiliksiz qamtamasyz etilýi sekildi jaǵdaılar kezdesedi.

«Búgingi tańda Qyzylorda oblysynda jıyntyq qýaty 89 MVt bolatyn 9 kún elektr stantsııasy jumys istep tur. Mınıstrlik jyl saıyn jańartylatyn energııa kózderi jobalaryn irikteý boıynsha aýktsıondar ótkizedi. Máselen, 2022 jylǵy aýktsıondyq saýda-sattyqqa Jańaqorǵan, Shıeli jáne Aral aýdandarynda 20 MVt-tan kún elektr stantsııasynyń 3 loty josparlanyp otyr», - dedi mınıstr.

Sondaı-aq, qazir Qyzylorda oblysyn gazdandyrý deńgeıi 66,5 paıyzdy quraıdy. Shamamen 550,8 myń adam tabıǵı gazǵa qol jetkizgen.

Gazben jabdyqtaý jónindegi jobalar túrli baǵdarlamalar arqyly jergilikti jáne respýblıkalyq bıýdjet, «QazaqGaz» kompanııasynyń qarajaty esebinen júrgizilýde.

«Byltyr Energetıka mınıstrliginiń bıýdjettik baǵdarlamasy aıasynda 4 jobany júzege asyrýǵa 2,8 mlrd teńge bólindi. Jyl qorytyndysy boıynsha Qazaly qalasy, Jalaǵash kenti jáne Shıeli aýdanyndaǵy Bekejanov eldi mekenin gazdandyrý boıynsha 3 joba aıaqtaldy. 2022 jyly jalǵasatyn 1 jobany jáne jańa 6 jobany qarjylandyrý úshin respýblıkalyq bıýdjetten gazdandyrýǵa 3,7 mlrd teńge mólsherinde qarajat kózdelgen», - dedi mınıstr.

Qyzylorda oblysy elimizde munaı óndirý kólemi boıynsha 5-oryndy enshileıdi. Óńirge munaı óndirýdiń jalpy kóleminiń 6,14 paıyzy tıesili.

Munaı óndirýdi «Qazgermunaı», «Petro Qazaqstan Qumkól Resorsız», «Torǵaı Petroleým» jáne ózge de 14 kompanııa júzege asyrady. Byltyr aımaqta munaı óndirý 4,3 mln tonnany qurasa, ol bıylǵy 4 aıda 1,4 mln tonnany shamalady.

Qyzylorda oblysynda ıgerilip jatqan ken oryndarynyń basym bóligi ıgerýdiń sońǵy satysynda tur. Bul rette munaı óndirýdiń jyl saıynǵy tabıǵı tómendeýi baıqalatynyn atap ótý kerek. Máselen, 2015 jyldan bastap aımaqtaǵy óndiris 2 ese tómendegen. Búgingi tańda jer qoınaýyn paıdalanýshylardy munaı eksportynyń úlesin óndirý kóleminen 50 paıyzdan astam kólemde ulǵaıtý máselesi tolǵandyrady.

«Osy másele boıynsha byltyr «Keńqııaq-Atyraý» munaı qubyry reversiniń jobasy iske asyryldy. Ol Pavlodar jáne Shymkent munaı óńdeý zaýyttaryn Batys Qazaqstan munaıymen (Atyraý, Mańǵystaý oblystary) senimdi júkteýdi qamtamasyz etýge jol ashty. Al Qyzylorda oblysynyń munaı óndirýshi kompanııalary úshin júktemeni azaıtýǵa múmkindik berdi. Ol iske qosylǵan sátten bastap Atyraý jáne Mańǵystaý oblystarynyń jer qoınaýyn paıdalanýshylary úshin ishki naryqqa munaı jetkizý boıynsha júkteme shamamen 10-15 paıyzǵa artty. Mınıstrlik ishki naryqqa munaı jetkizý boıynsha teńgerimsizdikti joıý jónindegi jumysty odan ári jalǵastyrady», - dedi mınıstr.



Jańalyqtar

MURAǴAT