Jańalyqtar  >

Qyzylorda oblysynda Tájikstanǵa baǵyt alǵan júk kóligi órtenip ketti

2022 jylǵy 28 qarasha, 14:56
Qyzylorda oblysynda Tájikstanǵa baǵyt alǵan júk kóligi órtenip ketti

QYZYLORDA. QazAqparat - Qyzylorda oblysynda jol boıynda júk kóligi janyp ketti, dep habarlaıdy QazAqparat tilshisi.

Oqıǵa 27 qarasha saǵat 19.40 shamasynda bolǵan.

112 qutqarý qyzmetine «Samara-Shymkent» trassasynyń Aral aýdany aýmaǵyndaǵy 1340 shaqyrymynda júk kóliginiń órtenip jatqany jóninde habar túsken.

«Habarlama boıynsha órtke qarsy qyzmetten bir tehnıka, 7 qyzmetker jumyldyryldy. Barlaý nátıjesinde Reseıden Tájikstanǵa baǵyt alǵan «Volvo» júk avtokóliginiń tirkemesine tıelgen turmystyq tehnıka men jıhazdar tolyǵymen janyp jatqany anyqtaldy. Órt sóndirýshilerdiń jedel is-qımylynyń nátıjesinde jalynnyń júk kóligi kabınasyna taralýyna jol berilmedi», - dedi Qyzylorda oblystyq tótenshe jaǵdaılar departamenti órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.

Vedomstvo málimetinshe, órttiń shyǵý sebebi men shyǵyny anyqtalyp jatyr.

Jaraqat alǵandar men qaza bolǵandar joq. Tilsiz jaý 20.27-de oqshaýlanyp, 20.53-te tolyǵymen sóndirildi.

Eske salsaq, budan buryn Qyzylordada qatty jelden mektep shatyry ushyp ketken edi.


Seriktester jańalyqtary

Jańalyqtar