Qyzylorda oblysy ákiminiń eki orynbasary taǵaıyndaldy
2022 jylǵy 25 maýsym 05:29

Qyzylorda oblysy ákiminiń eki orynbasary taǵaıyndaldy

QYZYLORDA. QazAqparat - Qyzylorda oblysy ákiminiń eki orynbasary taǵaıyndaldy, dep habarlaıdy QazAqparat tilshisi.

Prezıdent Ákimshiliginiń kelisimi boıynsha oblys ákiminiń ókimimen Serik Qojanııazov - oblys ákiminiń birinshi orynbasary, Nurymbet Saqtaǵanov oblys ákiminń orynbasary qyzmetine keldi.

Serik Qojanııazov 1965 jyly Qyzylorda qalasynda dúnıege kelgen. Kýzbass polıtehnıkalyq ınstıtýtyn ınjener-mehanık jáne L.Gýmılev atyndaǵy Eýrazııa ulttyq ýnıversıtetin ekonomıst mamandyqtary boıynsha bitirgen.


Eńbek jolyn 1989 jyly Qyzylorda jóndeý-mehanıkalyq zaýytynda ınjener-tehnolog retinde bastaǵan.

2001-2004 jyldary Qyzylorda oblysy ákimi apparatynyń ındýstrııalyq damý bóliminiń meńgerýshisi, 2005-2007 jyldary Qyzylorda oblysynyń kásipkerlik jáne ónerkásip departamentiniń dırektory, 2007-2008 jyldary Qyzylorda qalasynyń ákimi qyzmetterin abyroımen atqarǵan.

2008-2014 jyldary Qazaqstan Respýblıkasy Premer-Mınıstri Keńsesiniń uıymdastyrý jumysy jáne óńirlik damý bóliminiń bas ınspektory, bólim meńgerýshisiniń orynbasary, bólim meńgerýshisi boldy.

2014-2019 jyldary Qyzylorda oblysy ákiminiń orynbasary, Qazaqstan Respýblıkasy Prezıdentiniń «Baıqońyr» keshenindegi arnaýly ókili laýazymdaryn atqardy.

2019-2021 jyldary Qazaqstan Respýblıkasy Prezıdenti Ákimshiliginiń memlekettik baqylaý jáne aýmaqtyq-uıymdastyrý jumysy bóliminiń memlekettik ınspektory bolyp qyzmetin, 2021 jyldyń qańtar aıynan osy kezge deıin Qazaqstan Respýblıkasy Ekologııa, geologııa jáne tabıǵı resýrstar vıtse-mınıstri boldy.

Al Saqtaǵanov Nurymbet Amanuly 1970 jyly dúnıege kelgen. Qorqyt ata atyndaǵy Qyzylorda memlekettik, Máskeý memlekettik ekonomıka, statıstıka jáne ınformatıka, Sársen Amanjolov atyndaǵy Shyǵys Qazaqstan memlekettik ýnıversıtetterin pedagogıka, zańtaný, ekonomıka mamandyqtary boıynsha bitirgen.


Eńbek jolyn 1992 jyly Qyzylorda oblysynyń Syrdarııa aýdanyndaǵy №172 orta mektepte muǵalim retinde bastaǵan. Ár jyldary memlekettik qyzmette, sonyń ishinde keden organdarynda jaýapty basshylyq qyzmetterdi atqarǵan.

2007-2012 jyldary Qazaqstan Respýblıkasy Ekonomıka jáne bıýdjettik josparlaý mınıstrliginiń Syrtqy ınvestıtsııa kózderin josparlaý bóliminiń bastyǵy, atalǵan mınıstrdiń keńesshisi, Eńbek jáne áleýmettik qorǵaý mınıstrligi Mıgratsııa komıteti tóraǵasynyń orynbasary, Qazaqstan Respýblıkasy Prezıdenti Ákimshiliginiń memlekettik baqylaý jáne aýmaqtyq-uıymdastyrý jumysy bóliminiń memlekettik ınspektory.

2012-2021 jyldary Shyǵys Qazaqstan oblysy ákiminiń orynbasary, birinshi orynbasary, Shyǵys Qazaqstan oblysy, Ulan aýdanynyń jáne Semeı qalasynyń ákimi qyzmetterin abyroımen atqarǵan.

2021 jyldyń aqpan aıynan bastap osy kezge deıin Shyǵys Qazaqstan oblysy Jarma aýdanynyń ákimi boldy.

Eske salsaq, budan buryn Qyzylorda oblysy tabıǵı resýrstar basqarmasynyń basshysy taǵaıyndaldy.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT