Qyzmetimde qazaq tiliniń paıdasy kóp tıdi – polıtseı Vıtalıı Maksımov
2022 jylǵy 23 maýsym 18:46

Qyzmetimde qazaq tiliniń paıdasy kóp tıdi – polıtseı Vıtalıı Maksımov

ALMATY. QazAqparat – Almatyda qazaq tilin erkin meńgergen ári ony úırený esh qıyndyq týdyrmaıdy dep sanaıtyn Vıtalıı Maksımov esimdi polıtseı qyzmet etedi. «Polıtsııa kúni» merekesi qarsańynda polıtseımen suhbattasqan edik.

Vıtalıı Vasılevıch, sizdi búgingi kásibı merekeńizben quttyqtaımyn. Siz qashan jáne qaı jerde ómirge keldińiz?

- Men Almaty ooblysy, Aqsý aýdany, Mataı stansasynda 1996 jyly ómirge keldim. 2017 jyldan bastap búginge deıin Almaty qalasy Jetisý aýdanynyń patýrldik polıtsııa ınspektory bolyp qyzmet etip kelemin. Leıtenant shenim bar.

Bul salaǵa qalaı keldińiz?

- Kishkentaı kezimnen polıtsııa bolsam dep armandadym. Sol armanym búginde oryndalǵanyna qýanyshtymyn. Elimniń tynyshtyǵy úshin qyzmet etýdi abyroı sanaımyn.

Qazaq tilinde erkin sóıleıdi ekensiz. Aıtyńyzshy, bul tildi qalaı úırenip júrsiz?

- Endi men qazaq aýylynda týyp óstim, sonda turdym. Kórshilerim, dostarym, synyptastarym, bári qazaq boldy. Olarmen bala kezden osy tilde erkin sóılesip óstim. Sodan bolar, qazaq tilinde erkin sóıleımin. Biraq, ózim orys mektebinde oqyǵam.

Otbasyńyzda qazaqsha sóılesesizder me?

Úıde ákem men anam qazaqsha túsinedi, biraq, sóıleı almaıdy. Al sońymnan ósip kele jatqan eki qaryndasym qazaq tilin endi úırenip keledi. Áıelimmen qazaqsha sóılese beremiz. Aıtpaqshy, áıelim qazaq, aty jóni Aıdana Danıspekova, Taldyqorǵannyń týmasy, rýy – naıman. Aıta keteıin, mende qazaqtyń ult aspaptaryn jaqsy oınasam degen armanym bar. Búginde olardy aqyryndap úırenip júrmin.

Aıtyńyzshy, qazaq tilin úırený úshin adamǵa aldymen ne qajet?

Qazaq tilin úırený ár adamnyń arman, tilegine baılanysty dep oılaımyn. Eger adamnyń shyn arman, nıeti bolsa, ol tek qazaq tili emes, basqa da shet tilderdi erkin meńgerip alary sózsiz. Shynymdy aıtsam, qazir meniń polıtsııa qyzmetkeri bolyp otyrǵanym qazaq tiliniń arqasy. Osy tildiń arqasynda jumysqa kirgem. Búginde jumysta adamdarmen qazaqsha sóılesemin. Jalpy, qazaq tiliniń jeke ómirim men qyzmetimde kóp paıdasy tıdi.

Vıtalıı, polıtsııa bolǵysy keletin jastarǵa qandaı aqyl, keńes aıtar edińiz?

Polıtsııa bolǵysy keletin jastarǵa aıtarym, aldymen aldaryna qoıǵan maqsattaryna jete bilýi tıis. Sondaı-aq, boıynda adamnyń shynshyldyq, jigerlilik jáne basqa da jaqsy qasıetteri bolǵany durys.

Suhbatyńyzǵa rahmet! Eńbegińizge tabys tileımin.


Uqsas jańalyqtar

Jańalyqtar

Úrdis

MURAǴAT