Jańalyqtar  >
Qytaımen arada tájirıbe almasý aıasynda 100-den astam polıtseı arnaıy kýrstardan ótti - QR ІІM
2022 jylǵy 8 tamyz 11:50

Qytaımen arada tájirıbe almasý aıasynda 100-den astam polıtseı arnaıy kýrstardan ótti - QR ІІM

NUR-SULTAN. QazAqparat – QR Іshki ister mınıstri Marat Ahmetjanov Qytaı Halyq Respýblıkasynyń Qazaqstandaǵy Tótenshe jáne Ókiletti elshisi Chjan Sıaomen kezdesti.

Bul týraly QR Іshki ister mınıstrliginiń ókili Shuǵyla Turlybek vedomstvonyń onlaın brıfıngisinde aıtty, dep habarlaıdy QazAqparat tilshisi.

«Olar qylmysqa qarsy kúres, qoǵamdyq tártipti saqtaý jáne azamattardyń qaýipsizdigi salasyndaǵy yntymaqtastyqtyń jaı-kúıin talqylady. Qazaqstannyń Іshki ister mınıstrligi men QHR Qoǵamdyq qaýipsizdik mınıstrliginiń ózara is-qımyly tıisti quqyqtyq baza aıasynda iske asyrylyp otyr», - dedi Sh. Turlybek.

Osy oraıda ol shekara mańy yntymaqtastyǵyn keńeıtý boıynsha ózara saparlar men jumys kezdesýleri turaqty túrde ótkizilip turatynyn, kadrlardy daıarlaý jáne qaıta daıarlaý, jumys tájirıbesimen almasý jónindegi oqý kýrstary uıymdastyrylatynyn aıtty.

QR Іshki ister mınıstri Marat Ahmetjanovtyń aıtýynsha, Qazaqstan men Qytaıdyń quqyqtyq tártip organdarynyń yntymaqtastyǵy joǵary deńgeıde. Sońǵy bes jyl ishinde eki mınıstrlik delegattarynyń birqatar ózara saparlary uıymdastyrylyp, qyzmet ókilderi arasynda ondaǵan kezdesýler ótti.

Sonymen qatar, QR ІІM basshysy 108 qazaqstandyq polıtseıdiń ótken oqý kýrstaryn uıymdastyrýǵa kómekteskeni úshin qytaılyq qonaqqa alǵysyn bildirdi.

Mınıstrdiń pikirinshe, basym mindetterdiń qataryna ekstremızm men terrorızmge qarsy kúres, ınternet-alaıaqtyqqa qarsy is-qımyl jatady. Alaıaqtardy jaýapqa tartý úshin halyqaralyq aqparat almasýdy kúsheıtý qajet, óıtkeni bul áreketter kóp jaǵdaıda transulttyq sıpatqa ıe.

Óz kezeginde Chjan Sıao Qytaı tarapy azamattardyń qaýipsizdigi úshin tyǵyz ózara is-qımyl jasaýǵa múddeli ekenin atap ótti.

Taraptar jemisti yntymaqtastyqty nyǵaıtýdy jalǵastyrýǵa daıyn ekenin jetkizdi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT