Qytaıdaǵy ımporttyq taýarlar kórmesinde qazaqstandyq ónimder usynyldy
2021 jylǵy 5 qarasha 14:10

Qytaıdaǵy ımporttyq taýarlar kórmesinde qazaqstandyq ónimder usynyldy

ShANHAI. QazAqparat – Juma kúni Shanhaıda ashylǵan IV Qytaı halyqaralyq ımporttyq taýarlar kórmesinde (China International Import Expo) Qazaqstannyń ulttyq ekspozıtsııasy usynyldy, dep habarlaıdy QazAqparat menshikti tilshisi.

Ekspozıtsııa aıasynda un, et konservileri, sút ónimderi, ósimdik maılary, kondıterlik ónimder men bal, sýsyndar jáne taǵy basqa sanattar boıynsha otandyq tamaq ónerkásibi kompanııalarynyń ónimderi usynyldy.

Buǵan deıin Qytaı halyqaralyq ımport kórmesi (CIIE) dırektorynyń orynbasary Sýn Chenhaı «QazAqparat» agenttigine bergen suhbatynda Qazaqstannyń kóptegen taýarlary Qytaı naryǵynda tanymal bolǵanyn málim etti.

«Jibek joly» boıynda ornalasqan jáne «Qytaı-Eýropa» júk temirjol tasymaldarynyń mańyzdy kóliktik-logıstıkalyq haby bolyp tabylatyn Qazaqstannyń Qytaı naryǵyna shyǵýǵa múmkindikteri mol», - dep atap ótti Sýn Chenhaı.

Onyń aıtýynsha, jármeńkelerge qatysý men onlaın satylymdardyń arqasynda Qytaı naryǵynda qazaqstandyq ónimniń tanylýy artqan.

Buǵan deıin habarlaǵanymyzdaı, búgin Memleket basshysy Qasym-Jomart Toqaev IV Qytaı halyqaralyq ımporttyq taýarlar kórmesiniń ashylý rásiminde beıneúndeý jasady.



Jańalyqtar

MURAǴAT