+7 (701) 759 90 19
USD 447.67 EUR 491.36
RUB 5.74 CNY 63.07
Jańalyqtar

Qytaıda jabaıy janýarlardy jeýge qatań tyıym salyndy - Sheteldegi qazaq tildi BAQ-qa sholý

2020 jylǵy 22 aqpan 11:04
Bólisińiz:
Qytaıda jabaıy janýarlardy jeýge qatań tyıym salyndy - Sheteldegi qazaq tildi BAQ-qa sholý

NUR-SULTAN. QazAqparat - «QazAqparat» HAA ádettegideı sheteldegi qazaq tilinde taraıtyn aqparat kózderine aptalyq sholýyn usynady.

Ulanbatyrda Nur-Sultan qalasy atynda kóshe ashylady – KAZNEWS


Ulanbatyr qalasynyń meri S.Amarsaıhan Qazaqstan Respýblıkasynyń Mońǵolııadaǵy Tótenshe jáne Ókiletti Elshisi Jalǵas Ádilbaevpen kezdesti, dep habarlaıdy Mońǵolııanyń KAZNEWS aqparattyq portaly.

QR Elshisi Jalǵas Ádilbaev ózin qabyldaǵan astana ákimine alǵysyn bildire kele, eki el arasyndaǵy yntymaqtastyqty odan ári damytýǵa daıyn ekenin aıtqan.

Qazaqstan Respýblıkasynyń Mońǵolııadaǵy Tótenshe jáne Ókiletti Elshisi Jalǵas Ádilbaev Ulanbatyrda Nur-Sultan qalasynyń atyndaǵy kóshe ashý jumystary júrip jatqanyna alǵysyn bildirdi. Sondaı-aq, Ulanbatyr qalasymen týrızm baǵyttary boıynsha naqty baılanys jasaý nıeti bar nekenin aıtqan.

Al qala meri Qazaqstannyń qala qurylymy, jasampaz jumystary, azamattardy turǵyn úımen qamtamasyz etý saıasaty qatarly máselelerge qyzyǵýshylyq tanytyp otyrǵanyn, bul máseleler jóninde ózara tájirıbe almasý nıeti baryn málimdegen.

Esterińizge salsaq, ótken jyly qarasha aıynda Ulanbatyr qalasynyń bas menedjeri T.Gantómór Nur-Sultan qalasyna jumys saparymen barǵan edi. Sonda Ulanbatyrda Nur-Sultan qalasy atyndaǵy kóshe ashý týraly sóz bolǵan. Aldaǵy kóktemde Ulanbatyr qalasynyń «Baga toırýý» mańynan Nur-Sultan qalasy atyndaǵy kóshe ashylatyny týraly aıtylyp jatyr.

Túrkııanyń eń úlken kitaphanasy paıdalanýǵa berildi - TRT


Selchýk, Osmanly zamanynan shabyt alyp salynǵan jańa kitaphana ǵımaraty 7 kún ári 24 saǵat boıy qyzmet kórsetetin bolady, dep habarlaıdy Túrkııa Radıo Televızııa portaly.

Túrkııanyń eń úlken kitaphanasy sanalǵan bul ortalyq beısenbi kúni ashylady dep jazǵan túrkııalyq BAQ.

Atalǵan mádenı ortalyqtyń qurylysy 2016 jyly bastalǵan eken. Aýmaǵy 125 myń sharshymetrdi quraıtyn jańa kitaphana bir mezette 5 myń adamǵa qyzmet kórsete alady. Bul kitaphanada 4 mıllıon baspada basylǵan kitaptar, 120 mıllıon elektrondyq materıal jáne 550 myń elektrondyq kitap pen sırek kezdesetin jazba materıaldar bar.

«Sórelerde 100 túrli elden 134 tilde basylǵan kitap pen 120 mıllıon maqala saqtalǵan. Jańa kitaphanada sonymen birge jeke kollektsııalar, sırek kezdesetin qoljazbalar, padısha buıryqtary, kartalar, fotosýretter, markalar men gravıýralar da oqyrmanǵa usynylady» dep jazady TRT.

Kitaphananyń eń nazar aýdaratyn bólimderiniń biri – daýys jáne kórinis kitaphanasy. Bul bólimde 10 myń dana kórinis jáne dybys materıaldarynan turatyn kollektsııa bar. Sondaı-aq, oqyrmandar fılm mýzykalary men derekti fılm muraǵatyna qol jetkize alady.

«Kitaphanada balalar, jastar jáne eresekterge arnalǵan jasandy ıntellekt, kıber qaýipsizdik, kodtaý kýrstary ashylady. Túrkııanyń bul eń úlken mádenı, rýhanı ortalyǵy ári kollektsııa bolady, ári qyzmeti jaǵynan álemniń tańdaýly kitaphanalary qataryna enetini aıtyldy» dep túıindeıdi Túrkııa Radıo Televızııa portaly.

Ózbekstanda Jastar parlamenti qurylady - «ÓzA» aqparattyq agenttigi


Ózbekstanda Jastar parlamenti qurylmaq. Bul – jastardyń zań shyǵarý protsesine aralasýyn arttyryp, olardyń ıkemdiligin odan ári jetildirý maqsatynda jasalmaq, dep habarlaıdy «ÓzA» aqparattyq agenttigi.

Ataýly bastama Ózbekstan Respýblıkasy damýynyń 2017-2021 jyldarǵa arnalǵan bes bastamasy aıasynda kózdelip otyr.

«Joba jastar parlamentin qurý jáne onyń quramyn jasaqtaý tártibin belgileý, jastar parlamentiniń «Olıı Majlıs» palatalary komıtetterimen ózara baılanysyn jolǵa qoıýdy qarastyrady. Zań jobalaryn ázirleý men parlamenttik baqylaýdy júzege asyrý protsesine jastar parlamentarııleriniń belsendi qatysýyn qamtamasyz etý de kózdeledi», dep jazady ózbekstandyq BAQ.

«ÓzA» aqparattyq agenttiginiń keltirgen deregine súıensek, jobanyń oryndalýyna jaýapty Olıı Majlıs palatalary, Zań shyǵarý máseleleri jáne parlamenttik zertteýler ınstıtýty bolyp otyr. Bul rette 2020 jyldyń 1 naýryzyna deıingi is-sharalar baǵdarlamasy jasalady.

Shyńjańda 3 mıllıonnan astam oqýshy onlaın oqı bastady - Qytaıdyń «Ortalyq halyq radıosy» (CNR)


17 aqpan kúni tańerteń bastaýysh jáne orta mektep oqýshylaryna arnalǵan «onlaın synyp» sabaqtary bastalady, dep habarlaıdy qytaılyq kazakcnr.com saıty.

Onlaın rejımindegi sabaq búkil Shyńjań boıynsha ótkizile bastady. «Dál sol kúnnen bastap Shyńjań onlaın rejıminde oqytý úshin ınternetten basqa da aqparattyq quraldardy qoldanady. Shyńjańdaǵy bastaýysh jáne orta mektep oqýshylary spýtnıktik, ınternet teledıdaryn, bilim berý jelisiniń platformasyn jáne telearnalardy qoldandy» dep jazady Qytaıdyń «Ortalyq halyq radıosy».

Sonymen birge barlyq bastaýysh jáne orta mektep oqýshylardy jumys pen tynyǵý ýaqytyn sanaly túrde uıymdastyrýǵa, tamaq ishýge jáne densaýlyǵyn qorǵaýǵa mindetti delingen. Sondaı-aq oqýshylarǵa asa qaýipti juqpaly aýrýdan saqtaný úshin fızıkalyq kúshterin nyǵaıtýy, psıhıkalyq densaýlyqty saqtaýy, demalýdyń aralyǵyn durys ustaýy kerek dep eskertilgen.

Atalǵan qytaılyq BAQ-tyń deregine súıensek, sol kúni búkil Shyńjańdaǵy onlaın sabaq oqýǵa 3 mıllıonnan astam mektep oqýshysy qatysa bastaǵan.

Aıta ketý kerek, qazirgi ýaqytta búkil QHR boıynsha koronavırýstan saqtaný úshin karantın jarııalanǵan.

Ózbekstandyq aspazdar 797 keli laǵman asyp álemdik rekordty jańartty - «ÓzA» aqparattyq agenttigi


Máskeýde 13-16 aqpan kúnderi III halyqaralyq mádenıetter festıvali ótip, onda Ózbekstan, Qazaqstan, Qyrǵyzstan, Túrikmenstan, Grýzııa, Reseı, Tatarstan, Ázerbaıjan jáne Daǵystannan kelgen dástúrli óner sheberleri qatysty. Bul týraly osy aptada «ÓzA» aqparattyq agenttigi habarlaǵan bolatyn.

Aıtýly sharada Ózbekstandyq aspazdar 797 keli salmaqta laǵman pisirip álemdik rekordty jańartty. Bunyń ózi aldaǵy ýaqytta uıymdastyrylatyn festıvaldiń odan saıyn qyzyqty ótetinine yqpal etýi múmkin. Buǵan deıingi «Interrekord» halyqaralyq rekordtar kitapshasynda jazylǵanyndaı, 2015 jyl Almaty qalasynda jasalǵan bolatyn. Onda aspazdar 687 keli laǵman daıyndaǵan eken.


«Festıvalde aspazdardan basqa qolónershiler Buhara kilemderin, Rıshtan jáne Gıjdývan keramıkalarynan jasalǵan zattar men zergerlik buıymdaryn, chýst pyshaqtaryn, Marǵılan jibekterin jáne basqa da qolóner buıymdaryn kórermenge tartý etti» dep túıindeıdi ózbekstandyq BAQ.


Jabaıy janýarlardy jeýge tyıym salyndy - «Jenmın jıbao» (People Daily)


Aýrýdyń aldyn alý mekemelerimen medıtsınalyq mamandardyń alǵashqy tekserý-zertteýiniń nátıjesine sáıkes koronavırýs aýrýynyń jabaıy janýarlardan adamzatqa juǵýy, odan adamdar arasynda taralýǵa sebepshi bolý múmkindigi óte zor bolyp otyr. Bul týraly kazakh.people.com.cn habarlady.

«3 aqpan kúni Memlekettik bazar baqylaý-basqarý bas mekemesi, Ekologııalyq qorshaǵan orta mınıstrligi, Memlekettik orman sharýashylyǵy jáne jaıylym mekemesi sekildi 10 mınıstrlik pen komıtet (mekeme) jabaıy janýarlardy zańǵa qaıshy saýdalaýǵa tyıym salý úshin arnaýly zań erejesin birlesip belgiledi. Іndet taralǵan mezgilde búkil el boıynsha eń qatań basqarý-tizgindeý sharalary atqarylyp, jabaıy janýarlardy saýdalaýǵa jappaı tyıym salyndy» dep jazady BAQ.

Osyǵan sáıkes Qytaıdyń Jabaıy janýarlardy qorǵaý qoǵamy arnaıy úndeý jarııalady.

«Jabaıy janýarlardy azyq retinde jaýdi toqtataıyq jáne olarǵa esh jaqyndaýǵa bolmaıdy. Qajet bolǵan jaǵdaıda qaýipsiz aralyqty saqtaıyq. Bundaı tyıym salynǵan janýarlardy zańsyz saýdalaıtyn bazarlar jáne zańǵa qaıshy áreketter baıqalsa, sol jerdegi basqarýshy nemese zań atqarý oryndaryna dereý habarlansyn» dep málimdegen Qytaıdyń jabaıy janýarlardy qorǵaý qoǵamy.


Bizdiń kanalymyzǵa jazylyńyz:

Basty sózder: BAQ, Álem,
Bólisińiz:

Avtor:

Beısen Sultan

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Erbol Janat
Erbol Janat
954-059
REDAKTOR
Aıdar Ospanalıev
Aıdar Ospanalıev
954-059
REDAKTOR
Janat Qapalbaeva
Janat Qapalbaeva
954-059

MURAǴAT