Qysqy Olımpıada: Qazaqstan jalǵyz medalmen qaıtýdy dástúrge aınaldyrdy ma
2022 jylǵy 25 qańtar 17:05

Qysqy Olımpıada: Qazaqstan jalǵyz medalmen qaıtýdy dástúrge aınaldyrdy ma

NUR-SULTAN. QazAqparat – QR Mádenıet jáne sport vıtse-mınıstri Serik Jarasbaev Beıjińde ótetin XXIV Qysqy Olımpıadaǵa boljam týraly suraqtarǵa jaýap berdi, dep habarlaıdy QazAqparat.

«Qazaqstan Qysqy Olımpıadadan jalǵyz medalmen qaıtýdy dástúrge aınaldyrdy. Bul joly da bir medal alsaq, jetistik pe álde sátsizdik pe?», - dep suraq qoıdy jýrnalıst Ortalyq kommýnıkatsııalar qyzmetinde.

«Árıne, ár Olımpıadaǵa barǵan saıyn júldeden úmittenemiz. Bir medal bolsyn, eki medal bolsyn, bári júlde. Ol sportshylarymyz búkil ómirin arnaǵan, qan-terin tókkenniń nátıjesi. Jalpy Táýelsizdik alǵannan beri qysqy oıyndarda 8 medal alǵanbyz. Onyń tórteýin bir ǵana adam alǵan. Sondyqtan, qandaı medal alsaq ta, jetistik dep aıtýǵa bolady», - dep jaýap berdi S. Jarasbaev.

Spıker jalpy qysqy sport túrin damytýǵa aıryqsha nazar aýdarý qajet deıdi. Olımpıada aıaqtalǵan soń, 25 aqpanda mınıstrlik pen Úkimet tarapynan keńeıtilgen keńes ótedi. Sonda búkil suraq qarastyrylyp, qaı baǵytta jumys isteý kerektigi aıqyndalady.

«Medaldarǵa boljam aıtý óte qıyn, sońǵy eki jarym jyl boıy búkil álemde pandemııa bolyp jatyr. Biraq bizdiń sportshylarymyz bar kúshin salyp, óz joǵary nátıjelerine jetedi degen senimdemiz», - dedi vıtse-mınıstr.

Aıta keteıik, XXIV qysqy Olımpıada oıyndary Qytaıdyń Beıjiń qalasynda, 2022 jyldyń 4 men 20 aqpan aralyǵynda ótedi. Onda jalpy sany 109 medal sarapqa salynady. Jarystar Beıjiń qalasynan bólek qasyndaǵy ıAntsın jáne Chjıantszıakoý qalalarynda da ótedi.



Jańalyqtar

MURAǴAT