Qyrǵyzstanda Alash zııalylaryna qatysty jańa eńbekter tanystyryldy
2021 jylǵy 22 jeltoqsan 03:37

Qyrǵyzstanda Alash zııalylaryna qatysty jańa eńbekter tanystyryldy

BІShKEK. QazAqparat - Búgin Bishkekte Halyqaralyq Túrki akademııasy Júsip Abdrahmanov pen Qasym Tynystanovqa qatysty jańa eńbekterdi tanystyrdy. Bul týraly QazAqparat Halyqaralyq Túrki akademııasyna silteme jasap habarlaıdy.

Qyrǵyz Ulttyq ǵylym akademııasynyń Sh. Aıtmatov atyndaǵy Til jáne ádebıet ınstıtýtynda qyrǵyz halqynyń kórnekti tulǵalary – Júsip Abdrahmanov pen Qasym Tynystanovtyń týǵanyna 120 jyl tolýyna arnalǵan alqaly jıyn aıasynda «Qasym jyrlary» jáne memlekettik qaıratker Júsip Abdrahmanovqa qatysty arhıvtik materıaldar jınaǵynyń tusaýkeseri rásimi ótti.

Taǵylymdy sharaǵa Halyqaralyq Túrki akademııasynyń prezıdenti Darhan Qydyráli, Qyrǵyz Ulttyq Ǵylym akademııasynyń prezıdenti Mýrat Jýmataev, Qyrǵyz Respýblıkasy Prezıdentiniń keńesshisi Arslan Koıchıev, Qyrǵyz Respýblıkasynyń Jogorký Kenesh depýtaty Kanybek Imanalıev, Sh. Aıtmatov atyndaǵy Til jáne ádebıet ınstıtýty dırektory Abdyldajan Akmatalıev, tanymal qyrǵyz tarıhshysy Zaınıdın Kýrmanov, sonymen qatar memleket jáne qoǵam qaıratkerleri men zııaly qaýym ókilderi qatysty.

Aıta ketý kerek, Qasym Tynystanovtyń 1925 jyly qazaq jáne qyrǵyz tilderinde jaryq kórgen «Qasym jyrlary» atty kitaby Túrki akademııasy tarapynan túrik tiline tolyq aýdarylyp, faksımılesimen qosa akademııalyq jınaq retinde jarııanyp otyr. Biregeı basylymdaǵy jyrlar qyrǵyzsha latyn álipbıinde jáne túrikshe aýdarmasymen qatarlastyra berilgen.

Sonymen qatar, saıası tulǵa Júsip Abdrahmanov týraly Qazaqstan Respýblıkasy Ortalyq memlekettik arhıvi, Qazaqstan Respýblıkasy Prezıdentiniń arhıvi, QR Ortalyq memlekettik kıno-fotoqujattar men dybys jazbalar arhıvi qorlaryndaǵy qundy tarıhı materıaldary toptastyrylǵan jınaq oqyrmanǵa jol tartty.

Jıyn sońynda qazaq-qyrǵyz ǵylymı baılanystaryn nyǵaıtýdaǵy belsendi eńbegi úshin Arslan Koıchıev, Kanybek Imanalıev, Zaınıdın Kýrmanov, Túrki akademııasynyń Altyn medalimen, Aınýra Kadyrmanbetova, Aıda Kýbatova, Tamıla Mamatova Kúmis medalimen, al Negızbek Shabdanalıev pen Mırgúl Tekeshova Qurmet gramotasymen marapattaldy.


Jańalyqtar

MURAǴAT