Qutqarýshylar respýblıkalyq týrnırde ózara myqtyny anyqtady
2022 jylǵy 28 mamyr 12:53

Qutqarýshylar respýblıkalyq týrnırde ózara myqtyny anyqtady

ÓSKEMEN. QazAqparat – Qazaqstan qutqarýshylary arasynda respýblıkalyq týrnır bıyl Aqtaý qalasynda ótti. Doda qorytyndysynda Nur-Sultan qalasynyń komandasy birinshi oryndy ıelense, Shyǵys Qazaqstan oblysynyń qutqarýshylary ekinshi orynǵa jaıǵasty, dep habarlaıdy QazAqparat tilshisi.

Órt sóndirý-qutqarý sporty boıynsha týrnır Aqtaý qalasyndaǵy «Jas qanat» sport kesheninde ótti.

QR «Órt sóndirýshiler men qutqarýshylardyń sport federatsııasy» qoǵamdyq birlestigi atqarýshy komıtetiniń dırektory Dáýren Danaevtyń aıtýynsha, órt sóndirý-qutqarý sporty boıynsha mundaı jarystar qyzmetkerlerdiń uıymshyldyǵyn arttyryp, jumysqa, sportqa degen qulshynysyn, nıetin arttyrady.

Týrnırde 9 oblys jáne Nur-Sultan, Almaty, Shymkent qalalary tótenshe jaǵdaılar departamentteriniń komandalary, sondaı-aq Málik Ǵabdýllın atyndaǵy azamattyq qorǵaý akademııasynyń qurama komandasy jáne 12 áıelder komandasy synǵa tústi.

ShQO Tótenshe jaǵdaılar departamenti baspasóz qyzmetiniń málimetine súıensek, óńir namysyn qorǵaýǵa eń myqty degen qutqarýshylar attandy.

«Komandalar áýeli kedergileri bar júz metrlik jolaqtan júgirip jarysty. Onda óńir sportshylary úshinshi oryn aldy. Al oqý-jattyǵý munarasynyń 4-qabatynyń terezesine shabýyl satysymen kóterilýde bizdiń sportshylar birinshi boldy. Eki jarystyń qorytyndysy boıynsha Shyǵys Qazaqstan komandasy Nur-Sultan qalasynyń komandasymen upaı sany birdeı bolyp, birinshi oryndy bólisti. Alaıda, jaýyngerlik qanat jaıýda birneshe sekýnd jetpeı qaldy. Jarys qorytyndysy boıynsha ShQO TJD sportshylary ekinshi oryndy ıelendi», - delingen aqparatta.


Jańalyqtar

MURAǴAT