Qurylysshylar odaǵy «Eńbek» partııasyn qurmaq
2022 jylǵy 6 sáýir 14:08

Qurylysshylar odaǵy «Eńbek» partııasyn qurmaq

NUR-SULTAN. QazAqparat – Qazaqstan qurylysshylar odaǵy jańa «Eńbek» partııasyn qurýǵa nıetti. Bul týraly odaq tóraǵasy Talǵat Erǵalıev málimdedi, dep habarlaıdy QazAqparat.

«Biz 31 naýryz kúni odaǵymyzdyń jyldyq esep berý konferentsııasyn ótkizdik jáne oǵan elimizdiń 16 óńirindegi múshelerimiz qatysty. Bizdiń qurylymda 16 óńir bar jáne qurylys salasynda jumys isteıtin 1200-den astam kompanııa jáne 500 myńnan astam múshemiz bar. Sol eseptik konferentsııada bizdiń qurylysshylar «Eńbek» partııasyn qurý jóninde usynys berdi. Árıne, men osy qurylys odaǵynyń tóraǵasy bolǵandyqtan, usynystardy estip, qoldaý kórsettik. Ózderińiz de kórip otyrsyzdar, qazirgi ýaqytta túrli reformalar qajet. Biraq ókinishke oraı, sońǵy 10-20 jylda qurylys, ekonomıka salalaryndaǵy reformalardyń tıimdiligi tómen boldy. Sondyqtan, ekonomıkamyz damysyn dep, ózimiz de qurylysshylar retinde óndirispen aınalysatyn, jol salatyn, ınfraqurylym salatyn mekemelermen, jobalaýshylarmen birge saıası partııa qurýdy uıǵardyq», - dedi Talǵat Erǵalıev «Park Inn» qonaq úıinde ótken baspasóz konferentsııasynda.

Talǵat Erǵalıev tilshilermen suhbatynda qazirgi tájirıbeli partııalarmen qalaı básekelesetini týraly suraqqa jaýap berdi.

«Ol partııalar birneshe jyl jumys istedi jáne nátıje bermedi dep oılaımyn. Jańa adamdarǵa, partııalarǵa jol beretin ýaqyt keldi, olar aldyńǵy qatelikter men tujyrymdarǵa súıene otyryp, basqasha kózqaraspen qaraıdy. Baǵdarlamamyz bar. Árbir qazaqstandyqty baspanamen qamtý – basty maqsattarymyzdyń biri. (...) Biz eńbek adamdarymyz, eńbek etkimiz keledi. Bizdiń mindetimiz – azamattardy turǵyn úımen qamtamasyz etý. Jeti jyl buryn kezekte 450 myń adam turǵan. Qazir biz 15-17 mln sharshy metrden turǵyn úı salyp jatyrmyz, biraq olardyń sany azaıǵan joq. Táýelsizdik alǵanymyzǵa 30 jyl boldy, biraq 20 jyl buryn ózekti bolǵan problemalar áli de sheshilgen joq. Sondyqtan biz birigip, partııa ashyp jatyrmyz. Meniń oıymsha, bul nátıje beredi.

Biz áli ótinish bergen joqpyz. Partııa qurý týraly jarııaladyq, endi ózimiz daıyndalamyz jáne óńirlerdi daıyndaımyz. Kúzge qaraı Parlament konstıtýtsııalyq túzetýlerdi, partııalar týraly zańdy qabyldaıdy jáne biz Prezıdent óz Joldaýynda atap ótkendeı, elimizdiń damýy úshin eńbektenýdi jalǵastyramyz», - dedi T. Erǵalıev.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT