Kúrishbaev: Іri agrarlyq kompanııalar aýyldy qaıta túletýge atsalysýy kerek
2022 jylǵy 20 qańtar 10:43

Kúrishbaev: Іri agrarlyq kompanııalar aýyldy qaıta túletýge atsalysýy kerek

NUR-SULTAN. QazAqparat – Senator Aqylbek Kúrishbaev óziniń depýtattyq saýalynda Úkimettiń aýyl problemalaryn sheshý jónindegi jumysyn synǵa alyp, aýyldyń ózekti problemalaryna Premer-Mınıstrdiń nazaryn aýdardy, dep habarlaıdy QazAqparat tilshisi.

Onyń aıtýynsha, qazir elimizde aýyl turǵyndary áleýmettik eń nashar jaǵdaıda qalyp otyr. Onyń ústine, olardyń kópshiligi statıstıkanyń salystyrmaly túrde jaqsy kórsetkishterine qaramastan «shyn máninde tirshilik etýge» májbúr.

«Statıstıka derekteri boıynsha aýyldaǵy jumyssyzdar sany - 181 myń adam nemese 4,7 paıyz. Biraq, is júzinde jumyssyzdyq halyqtyń baǵyn ashpas sory boldy. Biz elimizdiń barlyq aýdandarynda aýyl turǵyndary arasynda arnaıy áleýmettik saýalnama júrgizdik. Olardyń basym kópshiligi jumystyń joqtyǵyn «basty másele» dep atady. Osy saýalnamada kórsetkendeı, aýyl turǵyndarynyń naqty tabysy aıyna 35 myń teńgeni quraıdy. Mundaı aqshaǵa qalaı kún kórýge bolady?», – dedi Aqylbek Kúrishbaev Senattyń jalpy otyrysynda.

Senator jumyssyzdyq saldary taǵy bir problemany týǵyzyp otyrǵanyn aıtyp, búginde aýyl halqynyń qalalarǵa ketý dınamıkasynyń artyp otyrǵanyn tilge tıek etti.

«Biz júrgizgen áleýmettik saýalnama nátıjeleri kórsetkendeı, eńbekke qabiletti halyqtyń 41 paıyzy aýyldardan qalaǵa kóshýdi qalaıdy. Árıne, ýrbanızatsııanyń álemdik úrdis ekeni túsinikti, biraq ony basqarý kerek qoı. Jaqyn mańdaǵy aýyldardan bir sátte halyqtyń jappaı kóshi-qony bastalsa, bizdiń qalalarymyzda ne bolmaq? Eger aýyl sharýashylyǵynda jumys isteıtin eshkim qalmasa, eldiń azyq-túlik qaýipsizdigin qalaı qamtamasyz etemiz? Shekaralas aýdandar qalaı qorǵalmaq?», – dedi ol.

Depýtat bul másele elimiz úshin tek ekonomıkalyq qana emes, sonymen qatar saıası jáne strategııalyq mańyzǵa ıe ekenin atap ótti. Sondyqtan Aqylbek Kúrishbaev Úkimettiń aýyldardy damytýǵa nege tıisti kóńil bólmegenine jáne senatorlardyń Parlamenttik tyńdaýda bergen usynystarynyń negizgi tarmaqtaryn áli de oryndamaǵanyna nazar aýdardy. Sonymen qatar qazaqstandyq aýyldy damytýǵa iri aýyl sharýashylyǵy kompanııalary belsendi úles qosýy tıis ekenin aıtty.


Jańalyqtar

MURAǴAT