Kún ystyqta densaýlyqty qalaı kútý kerek - dáriger keńesi
2022 jylǵy 28 maýsym 14:06

Kún ystyqta densaýlyqty qalaı kútý kerek - dáriger keńesi

ALMATY. QazAqparat - Almatyda sońǵy kún qatty ystyq bolyp tur. Osy oraıda № 18 qalalyq emhanasynyń jalpy praktıka dárigeri Aıana Qyryqbaeva ystyqta densaýlyqty qalaı kútý kerektigi týraly keńes berdi, dep habarlaıdy QazAqparat tilshisi.

Dárigerdiń aıtýynsha, qalypty temperatýrada salmaǵy 70 kg adamǵa kúnine 2,1 lıtr sý ishý kerek. Al kún ystyqta taǵy 1 lıtr qosyp ishken durys.

«Kún ystyqta ay, maıly jáne ystalǵan taǵamdy jeýge bolmaıdy. Ratsıonǵa ósimdik maılaryn, jemis, kókónisterdi qosý qajet. Kalorııalardy azaıtý kerek.

Ystyqta kıimniń matasy aýa men sýdy jaqsy ótkizgeni durys. Kıimniń matasy maqta jáne zyǵyrdan jasalǵan bolý kerek.

Sondaı-aq, maqta jáne vıskoza ónimderinen bolǵany durys. Sebebi, olar da ylǵaldy jaqsy sińiredi. Biz ony gıgroskopııalyq qasıetter dep ataımyz.

Jazda bas kıim óte qajet, sebebi, ol ádemi aksessýar ǵana emes, sonymen birge, kún sáýlesi men jelden qorǵaıtyn element.

SPF kremi - kúnnen qorǵaıtyn faktor nemese adamnyń kúıip ketpeıtindeı, kún astynda bolý ýaqytyn uzarta alatyn qorǵanys túri», - dedi Aıana Qyryqbaeva.

Ystyq aýa-raıynda túski saǵat 12–den 16-ǵa deıin eń qaýipti ýaqyt ekenin eske saldy.

«Bul ýaqytta aýa temperatýrasy aıtarlyqtaı kóteriledi. Sondyqtan bul ýaqytta dalaǵa shyqpaýǵa keńes beremiz.

Kondıtsıonerden adamdar kóbine angına jáne JRVI-men aýyrady. Ásirese, adam ystyqtan salqyn bólmege kirgen kezde, denede jınalǵan barlyq ter býlanyp, dene temperatýrasy tómendeıdi. Osylaısha adam salqyndaýdyń eki dozasyn alady. Jalpy, kondıtsıoner arqyly sýyq tııý nemese odan da aýyr aýrýǵa shaldyǵý qaýpi bar.

Al kólikte terezeni tolyq emes, sál ǵana ashyńyz nemese mıkroklımatty basqarýdyń avtomatty rejımin paıdalanbańyz», - degen keńester berdi dáriger.

Eske salaıyq, búgin Abaı, Qyzylorda, Jambyl, Túrkistan, Almaty oblystarynyń basym bóliginde kún qatty ysıdy.

Sondaı-aq, Almaty qalasynyń Tótenshe jaǵdaılar departamenti aptap ystyqqa baılanysty qala turǵyndaryna úndeý jasaǵan edi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT