Kún mobılderimen júgirýge qatysýshylar Qazaqstan boıynsha 2700 shaqyrymdy júrip ótedi
2022 jylǵy 25 maýsym 02:27

Kún mobılderimen júgirýge qatysýshylar Qazaqstan boıynsha 2700 shaqyrymdy júrip ótedi

BAIQONYR. QazAqparat – Baıqońyr qalasy kún mobılderimen halyqaralyq júrýdiń aralyq kezeńine aınaldy, dep habarlaıdy QazAqparat tilshisi.

Avtosherýge qatysýshylar 2700 shaqyrymdyq kúrdeli joldy óz qoldarymen jasalǵan kún energııasymen júretin kólikterimen eńseredi. Jarys Oral qalasynan bastalyp, Almatyda aıaqtalady.

Kún batareıalaryn negizgi qýat kózi retinde paıdalanatyn qatysýshylar ártúrli qalalardan – Sankt-Peterbýrg, Sochı, Astrahan, Perm, Aqtóbeden jınaldy. Baıqońyrda oǵan qala turǵyny – jeke kásipker Erlan Jappasbaev óziniń «Boran» kún kóligimen qosyldy.

Bul is-sharanyń bastamashysy Nıkıta Poddýbnov kún saıyn tizbek 45 km/saǵ jyldamdyqpen 150-200 shaqyrym júretinin, olar kún batareıalaryn ashyp, kólikterdi qaıta qýattaýǵa toqtaıtynyn, sonda túneıtinin aıtty.

«Biz Qazaqstan boıynsha baǵytty tańdadyq. Óıtkeni bul jerde aýa raıy ashyq bolǵandyqtan ǵana emes, jol polıtsııasyn qosa alǵanda, jol boıynda meıirimdi, qonaqjaı adamdardy kezdestiremiz», - dedi Nıkıta óz áserimen bólisip.

Belgili bolǵandaı, ótken jyly Poddýbnov kún mobılderimen birinshi ret júgirip ótken. Bıyl 8 kólikten turatyn top jınalyp, 5 kún mobıli Baıqońyrǵa jetti.

Ǵarysh qalasyndaǵy aıaldama Baıqońyrdaǵy jastar úshin óte paıdaly boldy. Avtosherýge qatysýshylar «Baıqońyrdyń bolashaǵy» jastar bastamalaryn qoldaý ortalyǵyna baryp, ǵaryshtyq tehnologııalardy qalaı paıdalaný kerektigi týraly aıtyp, suraqtarǵa jaýap berdi jáne ózderiniń kólik quraldaryn kórsetti.

Qala ákimshiliginiń basshysy Konstantın Býsygın de erekshe kólikterdi kórýge keldi, avtosherýge qatysýshylarǵa bastamasy úshin alǵysyn bildirip, Baıqońyrda balalarǵa arnalǵan kún energııasymen júretin kólikterdi zertteý jáne jobalaý boıynsha úıirmeler qurýdy usyndy.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT