QTJ men Álııa Nazarbaevanyń kompanııasy arasyndaǵy kelisimshart qashan kúshin joıady
2022 jylǵy 30 maýsym 17:16

QTJ men Álııa Nazarbaevanyń kompanııasy arasyndaǵy kelisimshart qashan kúshin joıady

NUR-SULTAN. QazAqparat – «Qazaqstan temir joly» ulttyq kompanııasy Álııa Nazarbaevanyń «Instant Payments» kompanııasymen jasalǵan shartqa qatysty túsinik berdi, dep habarlaıdy QazAqparat tilshisi.

Ortalyq kommýnıkatsııalar qyzmeti alańynda ótken baspasóz máslıhatynda kompanııa ókiline «QTJ Álııa Nazarbaevanyń «Instant Payments» kompanııasymen jasalǵan shartty qashan buzady?» degen saýal qoıyldy.

Bul saýalǵa «Qazaqstan temir joly» AQ ulttyq kompanııasynyń satý jáne klıenttermen jumys júrgizý departamentiniń dırektory Erlan Jamaıylov jaýap berdi.

«Bıylǵy aqpan aıynan bastap tıisti rásimdi júrgizip jatyrmyz. 18 naýryzda shartty buzý týraly kelisim jasaldy. Qazirgi kúni eki tarap qol qoıdy. Biraq bul óndiristik protsess bolǵandyqtan, jolaýshylardyń bılet satyp alýyna kedergi keltirmeı, tasymaldaý qyzmetinde aqaý bolmas úshin birtindep ótýimiz kerek. Búgingi tańda jańa úlgidegi shartty kelisý jáne ashyq tender qujattaryn rásimdep jatyrmyz», - dedi ol.

Onyń aıtýynsha, kelisim protsedýrasy «Samuryq-Qazyna» ál-aýqat qory bekitken erejege sáıkes júredi.

«Búgingi tańda úlgilik shartty kelisý rásimi júrgizilip jatyr, sodan keıin shart bekitiledi. Araǵa 45 kún salyp shart resmı saıtqa jarııalanady. Ondaǵy maqsat – kez kelgen adam tanysýy úshin jáne ashyq tenderge nıet bildirýshiler erkin qatysa alady. Tenderdi osy jazdyń sońyna deıin ótkizý josparlanyp otyr», - dedi E. Jamaıylov.


Seriktester jańalyqtary

Jańalyqtar

Úrdis

MURAǴAT