QR UQK basshysy Qasym-Jomart Toqaevqa shekarany nyǵaıtý sharalary týraly baıandady
2022 jylǵy 24 mamyr 17:28

QR UQK basshysy Qasym-Jomart Toqaevqa shekarany nyǵaıtý sharalary týraly baıandady

NUR-SULTAN. QazAqparat – QR Ulttyq qaýipsizdik komıtetiniń tóraǵasy Ermek Saǵymbaev Prezıdent Qasym-Jomart Toqaevqa vedomstvonyń osy aıda atqarǵan qyzmetiniń negizgi qorytyndylary, aldaǵy kezeńge arnalǵan mindetteri men Ulttyq qaýipsizdik komıtetin reformalaý týraly Jarlyqty júzege asyrý sharalary týraly esep berildi. QazAqparat bul týraly Aqordaǵa silteme jasap habarlaıdy.

Ermek Saǵymbaev Prezıdentke UQK organdarynyń halyqaralyq lańkestikke qarsy is-qımyldary, esirtki men qarý-jaraqtyń, sonyń ishinde qańtar oqıǵasy kezinde urlanǵan qarýlardyń zańsyz aınalymyna tosqaýyl qoıýǵa, Memlekettik shekaralardy nyǵaıtýǵa baǵyttalǵan sharalar týraly baıandady.

Memleket basshysyna berilgen málimetterge sáıkes, atqarylǵan is-sharalar nátıjesinde birqatar halyqaralyq jáne aımaqtyq esirtki tasıtyn joldar jabyldy, zańsyz aınalymdaǵy 15 keliden astam psıhotroptyq zattar men 4 tonna prekýrsor tárkilendi. Qarý-jaraq pen oq-dárilerdi satýmen aınalysqan qylmystyq toptardyń áreketiniń joly kesilip, jasyryn qoımalar anyqtaldy.

Terrorızmge qarsy ortalyq shtabtyń jaýyngerlik daıyndyq deńgeıin saqtaý úshin 3 komandalyq-shtabtyq jáne 29 jedel-taktıkalyq oqý-jattyǵý jıyny ótkizildi. El shekarasyn kúzetý barysynda 632 quqyq buzýshy ustaldy. Sonymen qatar Kaspııde 11 shaqyrymnan astam brakonerlik qural tárkilendi.

Quny 230 mıllıon teńgeden asatyn valıýta men altynnyń, 77,9 mıllıon teńge bolatyn taýarlardyń jáne 2,5 mıllıon teńge kólemindegi janar-jaǵarmaıdyń zańsyz aınalymyna tosqaýyl qoıyldy.

Sonymen qatar Memleket basshysyna Ulttyq qaýipsizdik komıtetin reformalaý jónindegi tapsyrmasynyń oryndalý barysy, sonyń ishinde negizgi jedel qyzmetterge el basshylyǵynyń tapsyrmalaryn júzege asyrýdy qamtamasyz etetin jáne osy saladaǵy qyzmettiń tıimdiligin arttyratyn qajetti qurylymdyq ózgerister engizý barysy týraly baıandaldy.


Jańalyqtar

MURAǴAT