QR Shańǵy federatsııasy: Poltoranın baılanysqa shyqpaı otyr

ASTANA. QazAqparat - Halyqaralyq shańǵy federatsııasynan QR Ulttyq shańǵy jarysynyń Ulttyq federatsııasy atyna Alekseı Poltoranınge qatysty resmı jaýap keldi, dep habarlaıdy QazAqparat Federatsııanyń baspasóz qyzmetine silteme jasap.

Halyqaralyq uıymnyń resmı habarlamasynda Alekseı Poltoranınniń dopıng daýyna baılanysty 1 naýryzdan bastap barlyq jarystardan shettetilgeni týraly jazylǵan.

«Biz ókinishke oraı, halyqaralyq uıymnan resmı habarlama alǵanymyzdy rastaımyz. Qujatta Halyqaralyq shańǵy federatsııasynyń pozıtsııasy aıtylǵan. Alekseı kóp nárselerge jaýap bermeı, máselelerdi ashyq kúıinde qaldyrýda. Ol QR shańǵy jarysynyń Ulttyq federatsııasy bas hatshysy men QR konsýlymen kezdespeı qoıdy. Jáne qamaýdan bosatylǵannan keıin baılanysqa shyqpaı, daýly máselege qatysty pikir bildirmeı otyr. Qazirgi kezdegi bizdiń maqsatymyz chempıonatqa qatysyp jatqan basqa sportshylarǵa qoldaý bildirý», - dedi QR shańǵy jarysy Ulttyq federatsııasynyń baspasóz hatshysy Samal Naýryzova.

Eske sala ketsek, Avstrııanyń Zeefelde qalasynda ótip jatqan álem chempıonatynda Alekseı Poltoranın jarys jolyna shyqpaı qaldy.

Nemis jýrnalısi Haıo Zeppelt Týıtterdegi akkaýntynda «shańǵy jarysynan ótip jatqan álem chempıonatynda Qazaqstan, Avstrııa jáne Estonııa sportshylary antıdopıngtik erejelerdi buzdy dep kúdikke ilingenin» jazdy. Atalmysh oqıǵaǵa qatysty Astanada baspasóz máslıhatyn ótkizgen Sport jáne dene shynyqtyrý komıtetiniń tóraǵasy Serik Sápıev «Men Alekseıdiń taza sportshy ekenine senimdimin» degen bolatyn.

Sondaı-aq, Avstrııada Alekseı Poltoranın qamaýdan bosatylǵany jáne Shańǵy federatsııasy Alekseı Poltoranınge qandaı jaza taǵaıyndaıtynyn jazǵan edik.