QR Prezıdenti Shveıtsarııada qazaqtyń kóne jádigerleri saqtalǵan mýzeıdi aralady
2021 jylǵy 30 qarasha 02:31

QR Prezıdenti Shveıtsarııada qazaqtyń kóne jádigerleri saqtalǵan mýzeıdi aralady

JENEVA. QazAqparat - Qazaqstan men Shveıtsarııa prezıdentteri Qasym-Jomart Toqaev pen Gı Parmelan Bern tarıhı mýzeıiniń Anrı Mozer toptamasyndaǵy XIX ǵasyrdyń qolóner týyndylaryn tamashalady. Bul týraly Aqorda saıtynda málim etildi, dep habarlaıdy QazAqparat.

Kelissózder aıaqtalǵan soń Qazaqstan Prezıdenti Qasym-Jomart Toqaev pen Shveıtsarııa Prezıdenti Gı Parmelan belgili dıplomat jáne saıahatshy Anrı Mozerdiń biregeı eksponattar toptamasyndaǵy keremet jádigerlerdiń biri – qazaqtyń barqyttan jasalǵan tuskilemin birge tamashalady.

Atalǵan jádigerdi qazaq sultany Baımuhammed XIX ǵasyrda shveıtsarııalyq dıplomatqa tartý etken. Táýelsizdigimizdiń 30 jyldyǵynda atalǵan jádiger eki el arasyndaǵy mádenı baılanystardyń erekshe sımvolyna aınaldy.

Anrı Mozerdiń toptamasynda tuskilemder, ulttyq qarýdyń túrleri: aıbaltalar, qylyshtar, qanjarlar, sondaı-aq at ábzelderi jáne basqa da buıymdar bar. Qazaq dalasynyń bıleýshileri atalǵan jádigerlerdi zertteýshige syılyq retinde bergen jáne olar Shveıtsarııaǵa jetkizilgen.

Eksponattardyń ishinde tuskilemderdiń alatyn orny erekshe. Olar qazaq halqynyń kórkem týyndysy ǵana emes, sonymen qatar Qazaq handyǵynyń tarıhyn ǵylymı turǵyda zertteý úshin qundy materıal bolyp tabylady.

Memleket basshysy tuskilemniń biregeıligin jáne onyń tarıhı qundylyǵyn atap ótip, atalǵan óner týyndysynyń Qazaqstanda da kórmege qoıylatynyna úmittenetinin aıtty.

Eske salaıyq, 28 qarashada Qazaqstan Prezıdenti Q.Toqaev resmı saparmen Shveıtsarııa konfederatsııasyna keldi.

Búgin Jenevada Qasym-Jomart Toqaev Shveıtsarııanyń Federaldyq Prezıdenti Gı Parmelanmen kelissóz júrgizedi, Dúnıejúzilik densaýlyq saqtaý uıymynyń basshysymen kezdesti, DDSU-nyń Dúnıejúzilik densaýlyq saqtaý assambleıasynyń arnaýly sessııasyna qatysty, sondaı-aq Investıtsııalyq dóńgelek ústel otyrysyna qatysty.

Budan bólek, Memleket basshysy BUU-nyń Jenevadaǵy bólimshesiniń Bas dırektory Tatıana Valovaıamen, Halyqaralyq Qyzyl Krest komıtetiniń prezıdenti Peter Maýrermen, Dúnıejúzilik saýda uıymynyń bas dırektory Ngozı Okondjo-Ivealamen kezdesti.

Sondaı-aq QR Prezıdenti Shveıtsarııa Prezıdenti Gı Parmelanmen kelissóz júrgizdi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT