+7 (701) 759 90 19
USD 425.78 EUR 494.08
RUB 5.98 CNY 66.23
Jańalyqtar

QR Prezıdenti Májilis jáne máslıhat depýtattarynyń saılaýy týraly úndeý jarııalady

2020 jylǵy 21 qazan 08:06
Bólisińiz:
QR Prezıdenti Májilis jáne máslıhat depýtattarynyń saılaýy týraly úndeý jarııalady

NUR-SULTAN. QazAqparat - Memleket basshysy Qasym-Jomart Toqaev QR Parlamenti Májilisi jáne máslıhat depýtattary saılaýyn taǵaıyndaý týraly úndeý jarııalady, dep habarlaıdy Aqorda. QazAqparat Úndeýdiń tolyq mátinin jarııalaıdy.

***

Qurmetti otandastar!

Búgin men Parlament Májilisi depýtattarynyń saılaýyn taǵaıyndaý týraly Jarlyqqa qol qoıdym. Ortalyq saılaý komıssııasynyń qaýlysymen barlyq deńgeıdegi máslıhat depýtattarynyń saılaýy taǵaıyndalady.

Aldaǵy saılaý konstıtýtsııalyq merzimge sáıkes, 2021 jyldyń 10 qańtarynda ótedi. Barlyq saıası partııalardyń bul saılaý naýqanyna qatysýǵa daıyndalýyna, saılaý aldyndaǵy platformasyn ázirleýine, partııalyq ınfraqurylymdardy jetildirýine ýaqyty jetkilikti boldy.

Ortalyq saılaý komıssııasy men Bas prokýratýra saılaýdyń zańdylyǵyn, ashyqtyǵyn jáne ádildigin saqtaý úshin turaqty baqylaý júrgizip otyrady.

Jańa saılaý naýqanyna deıin saıası jańǵyrý, kóppartııalyqty damytý jáne elimizdiń qoǵamdyq-saıası ómirine azamattardyń qatysý aıasyn keńeıtý jóninde sharalar qabyldandy.

Birinshi. «Qazaqstan Respýblıkasynyń Parlamenti jáne onyń depýtattarynyń mártebesi týraly» konstıtýtsııalyq zańǵa jáne «Qazaqstan Respýblıkasy Parlamentiniń komıtetteri men komıssııalary týraly» zańǵa túzetýler engizý arqyly parlamenttik oppozıtsııa ınstıtýtyn qurý máselesin qarastyratyn jáne onyń qyzmetin reglamentteıtin ózgerister men tolyqtyrýlar jasaldy.

Endi Parlament Májilisi turaqty komıtetteriniń bir tóraǵasy men eki hatshysy parlamenttik oppozıtsııa depýtattary arasynan saılanady.

Sonymen qatar, parlamenttik oppozıtsııa bir sessııa kezinde keminde bir ret parlamenttik tyńdaý ótkizý jóninde bastama kóterý quqyǵyn ıelenedi. Sondaı-aq bir sessııa kezinde keminde eki ret úkimet saǵatynyń kún tártibin aıqyndaıtyn bolady.

Budan bólek, saıası partııalar fraktsııalarynyń jetekshilerine Parlament palatalarynyń birlesken otyrystarynda, Parlament Májilisiniń plenarlyq otyrystarynda, turaqty komıtetterdiń, jumys toptarynyń otyrystarynda, parlamenttik tyńdaýlarda jáne basqa is-sharalarda sóz sóıleýge kepildi quqyq beriledi.

Ekinshi. «Qazaqstan Respýblıkasyndaǵy saılaý týraly» konstıtýtsııalyq zańda jáne «Saıası partııalar týraly» zańda qarastyrylǵan erejeler boıynsha parlamenttik tájirıbemizde alǵash ret partııalyq tizimge áıelder men jastar úshin 30 paıyzdyq kvota engizildi. Bul norma Parlamentke jáne jergilikti ókildi organdarǵa áıelder men jastardy tartýdyń tıimdi joly retinde olardyń elimizdegi qoǵamdyq-saıası úderisterge belsendi qatysýyna septigin tıgizedi.

Úshinshi. Aldaǵy máslıhattar saılaýy alǵash ret partııalyq tizim boıynsha ótedi. Proportsıonaldy model álemdik demokratııalyq tájirıbege tolyq saı keledi, saıası júıeni nyǵaıtýǵa, demokratııany damytýǵa yqpal etedi, saıası partııalardyń jumysyn jandandyrady.

Bul jańa bastamalar partııalarǵa elimizdiń saıası júıesindegi ustanymyn nyǵaıtý úshin qosymsha múmkindikter beredi.

***

Koronavırýs pandemııasy saldarynan týyndaǵan kúrdeli ekonomıkalyq daǵdarys kóptegen eldi qamtydy, sondaı-aq, búkil álemdik ekonomıkaǵa keri áser etti.

Qazirgi kúrdeli kezeńde Qazaqstannyń aldynda daǵdarysqa qarsy tıimdi sharalar qabyldaý, ornyqty ekonomıkalyq damýdy jáne azamattarymyzdyń áleýmettik ıgiligin qamtamasyz etý, halyqtyń ál-aýqatyn arttyrý mindeti tur.

Osy basymdyqtar jóninde meniń Qazaqstan halqyna arnaǵan Joldaýymda aıtyldy.

Parlamenttiń jáne jergilikti ókildi organdardyń jańartylǵan quramy elimizdegi áleýmettik-ekonomıkalyq reformalardy sapaly ári zańnamalyq turǵydan qamtamasyz etýge basa mán beredi.

Aldaǵy saılaý elimizdiń saıası júıesin jańartýdy qamtamasyz etetin saıası ınstıtýttardy dáıekti túrde demokratııalandyrýǵa jáne jańǵyrtýǵa Qazaqstannyń asa yqylasty ekenin taǵy da bir dáleldeıtin bolady.

Bizdiń ortaq mıssııamyz – Qazaqstandy órkendetý, azamattarymyzdyń ıgiligi úshin qyzmet etý. Qazaqstan halqy asa mańyzdy tarıhı syndarly sátterde bir jeńnen qol, bir jaǵadan bas shyǵara bildi. Halqymyz osy joly da elimizdi jan-jaqty jańǵyrtý baǵytyndaǵy jańa tarıhı mıssııasyn laıyqty atqarady dep senemin. Táýelsizdiktiń 30 jyldyǵy qarsańynda elimiz kemeldene túsip, damýdyń jańa kezeńine shyǵatynymyz anyq.

Memleketimizdiń barlyq azamattaryn belsendi azamattyq ustanymyn tanytýǵa, Parlament Májilisiniń jáne máslıhattardyń aldaǵy saılaýyna uıymshyldyqpen qatysýǵa shaqyramyn.


Bizdiń kanalymyzǵa jazylyńyz:

Bólisińiz:
Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Janıbek Amangeldı
Janıbek Amangeldı
954-059

MURAǴAT