QR Prezıdenti Qatar Ámirimen kezdesti
2022 jylǵy 21 maýsym 14:34

QR Prezıdenti Qatar Ámirimen kezdesti

NUR-SULTAN. QazAqparat - Prezıdent Qasym-Jomart Toqaev Qatar Ámiri sheıh Tamım ben Hamad Ál Tánımen kezdesti, dep habarlaıdy Aqorda.

Kezdesý barysynda memleketter basshylary Qazaqstan men Qatar arasyndaǵy yntymaqtastyqtyń qazirgi jaǵdaıyn jáne damý perspektıvalaryn jan-jaqty talqylady. Kóshbasshylar saýda-ekonomıkalyq baılanystardy nyǵaıtýǵa jáne birlesken ınvestıtsııalyq jobalardy júzege asyrýǵa ózara nıetti ekenin rastady. Memleket basshysy ekonomıkalyq yntymaqtastyqtyń perspektıvalary týraly aıta kele, eki el arasyndaǵy ózara saýda-sattyq kórsetkishterin arttyrý mańyzdy ekenine toqtaldy. Prezıdent eki memlekettiń úkimetteri men isker toptary arasyndaǵy yqpaldastyqty jandandyrýdy usyndy.

«Bizdiń birqatar ınvestıtsııalyq jobalarymyz bar. Búgin solardy sizdermen birlesip talqylaýǵa daıynbyz. Qazaqstan kompanııalary osy baǵytta Qatar bıznesimen tyǵyz yqpaldastyq ornatýǵa nıetti», – dedi Memleket basshysy.
Qasym-Jomart Toqaev Qatar Ámirin ózine yńǵaıly ýaqytta Qazaqstanǵa resmı saparmen kelýge shaqyrdy. Óz kezeginde sheıh Tamım ben Hamad Ál Tánı Dohanyń Qazaqstanmen kópjaqty ekonomıkalyq jáne ınvestıtsııalyq yntymaqtastyqty damytýǵa múddeli ekenin málimdedi.
«Búgingi ekonomıkalyq forýmǵa Qazaqstannyń qatysqany – men úshin úlken mártebe. Bizdiń ózara senimge negizdelgen qarym-qatynasymyz óte jaqsy. Birlesken jobalardy, ásirese, aýyl sharýashylyǵy salasynda júzege asyrýǵa daıynbyz. Bul elimiz úshin basym baǵyt jáne jýyq arada agroónerkásip keshenindegi birlesken jobalardy egjeı-tegjeıli talqylaý úshin arnaıy top jiberemiz», – dedi Qatar Ámiri.
Áńgime sońynda Tamım ben Hamad Ál Tánı Qazaqstanǵa shaqyrǵany úshin Qasym-Jomart Toqaevqa alǵys aıtyp, jaqyn arada elimizge saparmen kelýge nıetti ekenin naqtylady.

Uqsas jańalyqtar

Jańalyqtar

Úrdis

MURAǴAT