QR Prezıdenti Kaspıı mańy azyq-túlik habyn qurýdy usyndy
2022 jylǵy 29 maýsym 18:17

QR Prezıdenti Kaspıı mańy azyq-túlik habyn qurýdy usyndy

NUR-SULTAN. QazAqparat – Altynshy Kaspıı sammıtinde Prezıdent Qasym-Jomart Toqaev teńiz jaǵalaýynda ornalasqan elderge óńirlik azyq-túlik habyn qurýdy usyndy, dep habarlaıdy QazAqparat tilshisi.

«Óńirdegi azyq-túlik qaýipsizdigin qamtamasyz etýdiń mańyzy artyp keledi. Byltyr Qazaqstannyń Kaspıı jaǵasyndaǵy eldermen ózara saýda aınalymy shamamen 3,4 mlrd dollar boldy. Onyń 70 paıyzy Reseımen qurlyqtaǵy baǵyt boıynsha júzege asyryldy»,- degen Qazaqstan Prezıdenti óńirde Kaspıı jaǵasyndaǵy elderdiń azyq-túlik habyn qurýdy usyndy.


«Qazaqstannyń Ázerbaıjanmen aradaǵy taýar aınalymy edáýir, ıaǵnı 2,3 ese, Iranmen jáne Túrikmenstanmen 2 ese artqany baıqalady. Bul jerde bizdiń joǵary sapaly bıdaı (shamamen 5 mıllıon tonnadan astam) men un (1,5 mıllıon tonnaǵa jýyq) eksportynyń úlesi zor. Osy rette 1 mıllıon tonnadan astam maıly daqyldar shyǵarýǵa qorymyz bar. Budan bólek et-sút ónimderiniń eksportyn arttyrý úshin Qazaqstannyń áleýeti mol. Memleketterimizdiń ózara saýda-sattyǵyn kúsheıtý úshin zamanaýı logıstıkalyq ınfraqurylymdy dáıekti túrde damytý qajet. Sondyqtan Kaspıı mańy azyq-túlik habyn qurýdy usynamyz. Bul shyǵyndy barynsha azaıta otyryp, ózara taýar aınalymyn arttyrýǵa múmkindik beredi», - dedi Memleket basshysy.

Eske salsaq, búgin Qazaqstan Prezıdenti Kaspıı mańy memleketteri basshylarynyń altynshy sammıtine qatysý úshin Ashhabad qalasyna jumys saparymen keldi.

Sapar aıasynda Qasym-Jomart Toqaev Túrikmenstan Prezıdenti Serdar Berdimuhamedovpen jáne Túrikmenstannyń burynǵy Prezıdenti, Halyq Máslıhaty Ulttyq keńesiniń tóraǵasy Gýrbangýly Berdimuhamedovpen kezdesti.



Jańalyqtar

Úrdis

MURAǴAT