QR Prezıdenti Eýropa odaǵynyń Ortalyq Azııa jónindegi arnaýly ókilin qabyldady
2022 jylǵy 7 aqpan 18:12

QR Prezıdenti Eýropa odaǵynyń Ortalyq Azııa jónindegi arnaýly ókilin qabyldady

NUR-SULTAN. QazAqparat - Memleket basshysy Eýropa odaǵynyń Ortalyq Azııa jónindegi arnaýly ókili Terı Hakalany qabyldady. QazAqparat bul týraly Aqordaǵa silteme jasap habarlaıdy.

Memleket basshysy Qazaqstannyń Eýropa odaǵymen aradaǵy strategııalyq seriktestikti odan ári nyǵaıtýǵa basa mán beretinin atap ótti.

Qasym-Jomart Toqaev Eýropalyq Keńestiń Prezıdenti Sharl Mıshelge 10 qańtardaǵy beınebaılanys rejıminde ótken kezdesý barysynda elimizdi qoldap sóılegeni jáne yntymaqtastyqty nyǵaıtýǵa nyq senim bildirgeni úshin rızashylyǵyn aıtyp, sálemin joldady.

Qasym-Jomart Toqaev Terı Hakalanyń ótinishi boıynsha «qasiretti qańtar» oqıǵasy jóninde aıtyp berdi. Sondaı-aq Bas prokýratýraǵa bolǵan oqıǵaǵa qatysty tergeý jumystaryn ashyq ári ádil júrgizý jóninde tapsyrma berilgenin málimdedi. Memleket basshysy adam quqyqtary men bostandyǵynyń saqtalýy elimizdegi barlyq bılik tarmaǵy úshin basymdyq sanalatynyna nazar aýdardy.

Qazaqstan Prezıdenti saıası júıeni odan ári jańǵyrtýǵa jáne áleýmettik teńsizdikti sáıkestendirýge, ulttyq ekonomıkany ártaraptandyrýǵa baǵyttalǵan Jańa ekonomıkalyq baǵdardy iske asyrý jospary jóninde málimet berdi.

Qasym-Jomart Toqaev Eýropa odaǵymen yntymaqtastyqtyń barlyq baǵyty boıynsha tyǵyz baılanystardy damytýǵa jáne buǵan deıin qol jetkizilgen ýaǵdalastyqtardy tolyqqandy júzege asyrýǵa nıetti ekenin naqtylady.

Óz kezeginde Terı Hakala Brıýsseldiń Qazaqstanmen aradaǵy baılanystardy damytýǵa múddeli ekenin jetkizdi. Eýropalyq dıplomat Prezıdentke mazmundy ári paıdaly pikir almasqany úshin alǵys bildirdi. Sondaı-aq Eýropa odaǵy Prezıdenttiń saıası reformalaryn tolyq qoldaıtynyn jáne elimizdiń órkendeýine, turaqtylyǵyna múddeli ekenin aıtty.


Uqsas jańalyqtar

Jańalyqtar

Úrdis

MURAǴAT