QR Prezıdenti Dúnıejúzilik saýda uıymynyń bas dırektorymen kezdesti
2021 jylǵy 30 qarasha 00:05

QR Prezıdenti Dúnıejúzilik saýda uıymynyń bas dırektorymen kezdesti

JENEVA. QazAqparat - Memleket basshysy Qasym-Jomart Toqaev Dúnıejúzilik saýda uıymynyń bas dırektory Ngozı Okondjo-Ivealamen kezdesý ótkizdi. Bul týraly Aqordadan málim etti, dep habarlaıdy QazAqparat.

Kezdesý barysynda Qazaqstan men Dúnıejúzilik saýda uıymy arasyndaǵy yntymaqtastyqtyń perspektıvalary, onyń ishinde DSU-ǵa múshe elder mınıstrleriniń 12-konferentsııasyna elimizdiń tóraǵalyq etý máselesi talqylandy. Sondaı-aq halyqaralyq saýdany damytýdyń ózekti máseleleri jóninde pikirlerin ortaǵa saldy.

26 qarashada DSU Uıymǵa múshe memleketter mınıstrleriniń 12-konferentsııasynyń ótetin ýaqytyn keıinge shegerý jóninde málimdeme jasady. Jıyn 30 qarasha men 3 jeltoqsan aralyǵynda Jenevada ótýge tıis edi.

Ngozı Okondjo-Iveala indettiń órshýine baılanysty mınıstrler konferentsııasyn keıinge shegerýge týra kelgeni ókinishti jáıit ekenin jáne onyń óte aýyr sheshim bolǵanyn aıtty. Kezdesýge qatysýshylar is-sharany ótkizýdiń yqtımal jańa merzimderin talqylady.

Prezıdent DSU-men aradaǵy yntymaqtastyqtyń mańyzdylyǵy týraly aıta kele, pandemııa jaǵdaıynda Uıymnyń álemdik ekonomıkany qaıta qalpyna keltirý isindegi negizgi róline nazar aýdardy.

Qasym-Jomart Toqaev Ngozı Okondjo-Ivealanyń basshylyǵymen vaktsınanyń barlyq adamǵa birdeı teń dárejede qoljetimdiligin qamtamasyz etý úshin DSU-ǵa múshe memlekettermen, negizgi halyqaralyq uıymdarmen jáne vaktsına óndirýshilermen júrgizilip jatqan konstrýktıvti dıalogqa qoldaý bildirdi.

Áńgimelesý barysynda 2022 jyldyń qarasha aıyna josparlanyp otyrǵan Qazaqstannyń Dúnıejúzilik saýda uıymyndaǵy saýda saıasatyna alǵashqy sholýynyń shyǵarylymy talqylandy. Prezıdent elimiz úshin osy oqıǵanyń asa mańyzdy ekenin atap ótti.

Memleket basshysy Qazaqstannyń DSU qaǵıdalary men erejelerine, sondaı-aq osy uıymǵa kirgen kezde ózine júktelgen mindetterge beıildiligin rastaı alatynyna senim bildirdi.

Kezdesý sońynda Qasym-Jomart Toqaev Ngozı Okondjo-Ivealany Qazaqstanǵa saparmen kelýge shaqyrdy.

Eske salaıyq, 28 qarashada Qazaqstan Prezıdenti Q.Toqaev resmı saparmen Shveıtsarııa konfederatsııasyna keldi.

Búgin Jenevada Qasym-Jomart Toqaev Shveıtsarııanyń Federaldyq Prezıdenti Gı Parmelanmen kelissóz júrgizedi, Dúnıejúzilik densaýlyq saqtaý uıymynyń basshysymen kezdesti, DDSU-nyń Dúnıejúzilik densaýlyq saqtaý assambleıasynyń arnaýly sessııasyna qatysty, sondaı-aq Investıtsııalyq dóńgelek ústel otyrysyna qatysty. Budan bólek, Memleket basshysy BUU-nyń Jenevadaǵy bólimshesiniń Bas dırektory Tatıana Valovaıamen, Halyqaralyq Qyzyl Krest komıtetiniń prezıdenti Peter Maýrermen kezdesti.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT