QR Prezıdenti BAQ qyzmetkerlerin kásibı merekesimen quttyqtady
2022 jylǵy 28 maýsym 07:59

QR Prezıdenti BAQ qyzmetkerlerin kásibı merekesimen quttyqtady

NUR-SULTAN. QazAqparat - Memleket basshysy Qasym-Jomart Toqaevtyń Buqaralyq aqparat quraldary qyzmetkerlerin kásibı merekesimen quttyqtady, dep habarlaıdy QazAqparat Aqordanyń resmı saıtyna silteme jasap.

Qurmetti jýrnalıster!

Buqaralyq aqparat quraldarynyń qyzmetkerleri!

Sizderdi kásibı merekelerińizben shyn júrekten quttyqtaımyn!

Aqparat salasynda jumys isteý – úlken mártebe ári zor jaýapkershilik. Otandyq baspasóz elimizdiń tutastyǵy men tatýlyǵyn nyǵaıtý jolynda eleýli ról atqarady. Sóz ónerin qasıet tutyp, abyroı bıiginen kórinip júrgen kásibı jýrnalısterimiz az emes. Olar eseli eńbegimen oqyrmannyń, kórermenniń alǵysyna bólenýde. Bul – el ıgiligi jolyndaǵy adal ári qajyrly eńbekterińizge berilgen baǵa.

Búginde áleýmettik jelilerde, ınternette jalǵan aqparat kóbeıip ketkenin kórip otyrmyz. Osyndaı kúrdeli jaǵdaıda sizderdiń shynaıy ári synı kózqarastaryńyz túrli keleńsizdikke tosqaýyl bolar edi. Qazir qoǵamdaǵy basymdyqtar ózgerip jatyr. Kásibı jýrnalıster qyzmetiniń mańyzy arta tústi.

Biz Jańa, Ádiletti Qazaqstandy qurýǵa kiristik. Bul – barsha otandasymyzdyń aldynda turǵan mańyzdy mindet. Sizderdiń maqalalaryńyz ben sıýjetterińiz, jýrnalıstik zertteýlerińiz osy bastamaǵa úles qosary sózsiz. Sondyqtan naǵyz kásibı mamandardyń eńbegin laıyqty baǵalaýdyń sımvoldyq máni bar.

Mirjaqyp Dýlatulynyń «Qaı jurttyń baspasózi myqty bolsa, sol eldiń ózi de kúshti» degen tujyrymy búgin de barynsha ózekti. Elimizdiń aqparattyq qaýipsizdigi men ıdeologııalyq derbestigin saqtaý úshin otandyq jýrnalısterdiń Qazaqstanda jáne álemde bolyp jatqan úderister týraly óz kózqarasy bolýy kerek. Biz qoǵamǵa úlgi-ónege kórsetip, memleket isin ilgeriletýge atsalysýymyz qajet. Óıtkeni halyqtyń senimin aqtaý – azamattyq boryshymyz.

Biz tatýlyq pen birlikti saqtaı otyryp, Jańa Qazaqstandy qurý jolynda jańa belesterdi birge baǵyndyratynymyzǵa senemin.

Barshańyzǵa shyǵarmashylyq shabyt, tolaǵaı tabys tileımin!


Uqsas jańalyqtar

Jańalyqtar

Úrdis

MURAǴAT