QR Parlamenti palatalarynyń birlesken otyrysy bastaldy
2022 jylǵy 30 maýsym 10:01

QR Parlamenti palatalarynyń birlesken otyrysy bastaldy

NUR-SULTAN. QazAqparat - Búgin QR Parlamenti palatalarynyń birlesken otyrysy ótip jatyr, dep habarlaıdy QazAqparat tilshisi.

Atap aıtqanda, otyrysta QR Prezıdenti Qasym-Jomart Toqaevtyń BUU-nyń mıssııalaryna qatysý úshin Qazaqstan Respýblıkasy Qarýly Kúshteriniń bitimgershilik kontıngentin jiberý týraly usynysy talqylanyp jatyr.

Sonymen qatar, depýtattar jetinshi saılanǵan Parlamenttiń ekinshi sessııasynyń jumysyn aıaqtaý taqyrybyn qaraıdy.

Budan buryn habarlanǵandaı, 23 maýsymda Májilis tóraǵasy Erlan Qoshanov QR Parlamenti palatalarynyń birlesken otyrysyn shaqyrý týraly Ókimge qol qoıdy.

Osy aptada Senat tóraǵasy Máýlen Áshimbaev ekinshi sessııanyń jumysyn qorytyndylady.

Onyń sózine qaraǵanda, Parlament ekinshi sessııada Úkimetpen birlese otyryp, 78 zań qabyldady.

«Olar Prezıdentimizdiń tapsyrmalaryn, ulttyq jobalar men memlekettik baǵdarlamalardy iske asyrýǵa arnaldy. Zań shyǵarý isinde adam quqyǵyn qorǵaý, azamattardy áleýmettik jaǵynan qamtamasyz etý máselesine basa mán berildi. Memlekettik basqarý júıesin jetildirýdi, ekonomıkamyzdy odan ári damytýdy jáne elimizdiń qaýipsizdigin kúsheıtýdi kózdeıtin zańdar qabyldandy. Sessııa barysynda azamattardyń ál-aýqatyn arttyrýǵa arnalǵan keshendi is-sharalar men qoǵamdyq-saıası bastamalardy zańnamalyq turǵydan ýaqtyly qamtamasyz etýge basa mán berildi. Qoǵamdaǵy áleýmettik teńsizdikti joıýǵa, erekshe qajettiligi bar azamattardy jan-jaqty qoldaýǵa arnalǵan normalar qabyldandy.

Osyǵan qaraı senatorlar Memleket basshysynyń tapsyrmalaryn oryndaý maqsatymen zańǵa bastamashyldyq etý quqyǵyn keńinen paıdalandy. Birinshi sessııada Senat depýtattary 7 zańǵa bastamashy bolsa, bul sessııada 18 zań jobasy boıynsha bastamashyldyq jasady. Aldaǵy ýaqytta da osy qarqyndy saqtaımyz dep senemin», - dedi M. Áshimbaev.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT