QR MSM frıstaıl-mogýl jattyqtyrýshysyn aıyptaýǵa qatysty pikir bildirdi
2022 jylǵy 25 qańtar 16:36

QR MSM frıstaıl-mogýl jattyqtyrýshysyn aıyptaýǵa qatysty pikir bildirdi

NUR-SULTAN. QazAqparat – «QR Mádenıet jáne sport vıtse-mınıstri Serik Jarasbaev frıstaıldan ulttyq quramanyń burynǵy sportshysynyń óz bapkerin sybaılas jemqorlyq jasady dep aıyptaǵany týraly suraqtarǵa jaýap berdi, dep habarlaıdy QazAqparat.

2021 jyldyń qazan aıynda frıstaıldan ulttyq quramanyń burynǵy sportshysy Aleksandr Gebert óz bapkerin alym-salyq jınady, biliksizdik tanytty jáne quramadan zańsyz shyǵardy dep aıyptaǵan edi.

«Iá, frıstaıl-mogýl quramasynda mundaı jaǵdaı boldy. Búginde osy másele boıynsha resmı ýákiletti organdar tekserý júrgizdi jáne sybaılas jemqorlyq boıynsha esh quqyqbuzýshylyq bolmaǵanyn anyqtady. Árıne, kóptegen sportshylar belgili bir dárejede óz narazylyqtaryn bildirýde bas jattyqtyrýshylardy nemese qasyndaǵy jattyqtyrýshylardy kinálaı bastaıdy. Bul oqıǵadaǵy bas jattyqtyrýshy Elena Krýhlyhınany frıstaıl-mogýldaǵy eń jaqsy mamandardyń biri ekenin aıtqym keledi. Muny sporttyq prıntsıp boıynsha da dáleldeý ońaı, ol Olımpıada oıyndarynyń jalǵyz júldegerin daıyndaǵan adam. Ony qandaı da bir nárse úshin kinálaý durys bolmas edi», - dedi vıtse-mınıstr Ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, memlekettik organdar óz ýaqytynda máselege taldaý jasady jáne tıisti qorytyndysyn berdi.

«2018 jyly Mádenıet jáne sport mınıstrligi sybaılas jemqorlyq táýekelderin boldyrmaý úshin Sybaılas jemqorlyqqa qarsy qyzmetpen jáne Olımpıada komıtetimen birlesip, bas jattyqtyrýshynyń esh qarjylyq operatsııa jasamaıtyny, bárin Olımpıada komıtetiniń qyzmetteri arqyly júrgizý sheshimin qabyldady. Mysaly, qonaq úı úshin tólem qolma-qol aqshasyz birden tólenedi. Sportshylardyń tamaqtanýy men kúndelikti júrip-turýyna kelsek, qarajat ár sportshynyń kartasyna jeke túsedi. Sporttyq fýnktsıoner retinde bul sybaılas jemqorlyq táýekelderin boldyrmaý úshin úlken jetistik jáne mańyzdy qadam dep sanaımyn. Bolashaqta biz sybaılas jemqorlyq táýekelderiniń aldyn alý boıynsha osy jumysty jalǵastyrýǵa nıettimiz», - dep atap ótti Serik Jarasbaev.


Jańalyqtar

MURAǴAT