QR Konstıtýtsııalyq Keńesi konstıtýtsııalyq zańdylyqtyń jaı-kúıi týraly joldaýyn jarııalady

NUR-SULTAN. QazAqparat - Búgin Parlament palatalarynyń birlesken otyrysynda «Qazaqstan Respýblıkasyndaǵy konstıtýtsııalyq zańdylyqtyń jaı-kúıi týraly» QR Konstıtýtsııalyq Keńesiniń jyl saıynǵy joldaýy jarııalandy, dep habarlaıdy QazAqparat.

QR Konstıtýtsııalyq Keńesiniń tóraǵasy Qaırat Mámı atap ótkendeı, Konstıtýtsııa - egemendigimizdi pash etetin, azamattaǵymyzdy aıqyndaıtyn mańyzdy qujat jáne tatýlyqty tý etken eldigimizdiń altyn qazyǵy. Ata Zańdy qurmetteý, buljytpaı oryndaý - alǵa qoıylǵan bıik maqsattarǵa qol jetkizýdiń alǵysharty. Memleket basshysy ókilettiginiń kóshýi, QR Prezıdentiniń kezekten tys saılaýy Konstıtýtsııanyń talaptaryna qatań sáıkestikte ótti.

Sonymen qatar ol memlekettilik damýynyń jańa dáýirinde memlekettiń jáne azamattardyń eń basty mindeti Konstıtýtsııanyń erejeleri men normalaryn qurmetteý ári júzege asyrý ekenin erekshe atap ótti.

Konstıtýtsııalyq baqylaý organynyń joldaýynda Konstıtýtsııalyq Keńestiń qorytyndy sheshimderin oryndaýda jaǵymdy úrdister baıqalady.

Máselen, onyń quqyqtyq ustanymdaryn iske asyrý úshin jyl basynda zańnamada memleket muqtajy úshin múlikti kúshtep aıyrý kezinde onyń qunyn óteý burynǵydaı kadastrlyq nemese sharttyq emes, naryqtyq baǵasy boıynsha júzege asyrylatyny bekitildi. Atqarýshylyq is júrgizýde kúshtep ákelýdi qoldaný tártibi egjeı-tegjeıli rettelip, ony qoldaný protsesinde memlekettik organdar ókilettikteriniń ara-jigi ajyratyldy. Ákimshilik rásimdik-protsestik kodekstiń, halyqtyń kóshi-qony salasyndaǵy qoǵamdyq qytanastardy retteıtin zańnyń jobalary, sondaı-aq normashyǵarmashylyq protsesti jetildirýge, zańnamany júıeleýge jáne quqyq qoldanýdy jaqsartýǵa baǵyttalǵan sharalar ázirlendi. Zańnamalyq aktilerdiń bir-birine qaıshy keletin jáne azamattardyń quqyqtary men bostandyqtaryn buzýǵa jaǵdaı jasaıtyn erejelerdi alyp tastaý boıynsha jumys jalǵasýda.

Konstıtýtsııalyq is júrgizý praktıkasyn jáne zańnamany damytýdyń qazirgi zamanǵy trendterin taldaýdy eskere otyryp, Konstıtýtsııalyq Keńes elimizde quqyqtyq memleket qaǵıdattaryn nyǵaıtý boıynsha naqty usynystar engizdi.

Konstıtýtsııalyq Keńes zańnamalyq massıvti konstıtýtsııalandyrý deńgeıin arttyrý qajet dep paıymdaıdy. Usynymdardyń birqatary adam quqyqtaryn qorǵaý máselesine qatysty. Bul áıelderdiń jáne balalardyń zańdy múddelerin qorǵaýdy kúsheıtý, menshik quqyǵyna qol suǵylmaýshylyq kepildikterin nyǵaıtý, sot isin júrgizýdiń barlyq túrlerinde májbúrleý sharalaryn qoldaný tártibin jetildirý, qylmystyq protseste jekeshe aıyptaý isteri boıynsha jábirlenýshilerdiń quqyqtaryn keńeıtý jáne basqa da usynystar qamtylǵan. Qaırat Mámı sottardyń qoldanysqa engizilgen quqyqtyq aktilerdiń konstıtýtsııalylyǵyn tekserý týraly usynystarmen Konstıtýtsııalyq Keńeske júginý múmkinshiligin keńinen paıdalaný qajettigi týraly aıtty.

Budan buryn habarlanǵandaı, Májilis tóraǵasy Nurlan Nyǵmatýlın QR Parlamenti palatalarynyń birlesken otyrysyn shaqyrý týraly Ókimge qol qoıǵan bolatyn.