Kóterme-taratý ortalyqtary jumysynda birqatar qıynshylyqtar bar - senator
2021 jylǵy 3 jeltoqsan 12:51

Kóterme-taratý ortalyqtary jumysynda birqatar qıynshylyqtar bar - senator

NUR-SULTAN. QazAqparat - Senattaǵy parlamenttik tyńdaýda depýtat Muhtar Jumaǵazıev jeke kóterme-taratý ortalyqtary óz jumysy barysynda birqatar qıynshylyqtarǵa tap bolǵanyn aıtty, dep habarlaıdy QazAqparat tilshisi.

«Agrarlyq sektordyń basty maqsatyn aıtatyn bolsaq, ol- memlekettiń azyq-túlik qaýipsizdigin qamtamasyz etý. Qazirgi pandemııa kezinde álemde azyq-túlik ınflıatsııasynyń ósýi bizdiń elge de áserin tıgizdi. Máselen, bıylǵy jylǵy qazan aıynyń qorytyndysy boıynsha jyldyq ınflıatsııa 8,9%-dy qurady. Bul rette baǵanyń jyldyq ósýine salymnyń jartysynan kóbin azyq-túlik ınflıatsııasy qurady. Baǵanyń turaqty ósýi men ınflıatsııalyq kútýlerdiń joǵary bolýyna baılanysty Prezıdent azyq-túlik taýarlarynyń tıimdi baǵasyn qalyptastyrý men bólýdi qamtamasyz etýdi tapsyrdy. Bul rette aýylsharýashylyq taýar óndirýshileriniń óz ónimderin satý baǵasyna aıtarlyqtaı áser ete almaıtyndyǵyn jáne kóbinese satyp alý uıymdarynyń baǵalaryn qabyldaýǵa májbúr bolatyndyǵyn atap ótken jón», - dedi M. Jumaǵazıev «Aýyl sharýashylyǵyn damytýdyń ózekti máseleleri men perspektıvalary» taqyrybyna arnalǵan parlamenttik tyńdaýda.

Onyń paıymynsha, osylaısha, aýylsharýashylyq ónimderiniń baǵasy ósýiniń sebepteri shaǵyn jáne aýyl sharýashylyǵynyń barlyq óniminiń 41,5%-yn qamtamasyz etetin jeke qosalqy sharýashylyqtardyń óz ónimderiniń satý múmkindikteriniń shekteýlýimen qosa, ónimder saýda oryndaryna deldaldar arqyly ótýinde.

«Memlekettik organdar bul máseleni kóterme-taratý ortalyqtaryn salý arqyly sheshiletine senimdi, alaıda qazirdiń ózinde óńirlerde qyzmet kórsetip otyrǵan birneshe jeke kóterme-taratý ortalyqtary óz jumysy barysynda birqatar qıynshylyqtar keshýde», - dedi senator.

Osy oraıda ol kóterme-taratý ortalyqtarynyń mártebesi jáne onyń qyzmetine qatysty normatıvtik quqyqtyq bazanyń joqtyǵy, memlekettik ári jergilikti atqarýshy organdary, aýylsharýashylyq taýar óndirýshileri jáne jeke qosalqy sharýashylyqtary arasynda ózara is-qımyldyń bolmaýy máselesin atady.

«Óndirýshilerden ortalyqtarǵa deıingi tizbektiń ár býyny boıynsha ónimdi jetkizý tetigi pysyqtalmaýy syndy basqa da máseleleri joq emes», - dedi depýtat.

Osyǵan baılanysty zańnamalyq bazany jetildirý maqsatynda tıisti usynystar jasaldy:

- «Kóterme-taratý ortalyqtarynyń qurylysy» jobasynyń pasportyna ǵımarat qurylysy men jabdyq satyp alý qunynan ınvestıtsııalyq salymdardy óteýdi 25% sýbsıdııalaýdy engizý;

- Mindettemeler bóliginde agroónerkásiptik keshenin sýbsıdııalaý qaǵıdalary týraly Aýyl sharýashylyq mınıstriniń buıryǵyna ózgerister engizý nemese sýbsıdııalanǵan sharýalar óndirgen ónimniń belgili bir kólemin kóterme-taratý ortalyqtaryna jetkizýdi mindetteý;

- Elde óndiriletin aýyl sharýashylyǵy taýarlarynyń bir tizbesi boıynsha taýar ótkizý júıesine qatysýshylarǵa qosylǵan qun salyǵynan bosatý túrindegi yntalandyrý sharalaryn engizý.

- Aýylsharýashylyq taýar óndirýshilerimen ortalyqtardyń arasynda forvardtyq kelisim-sharttarmen satyp alý tetigin pysyqtaý men aınalym qarajat bólýdi qarastyrý.


Avtor:
Tilshi

Jańalyqtar

MURAǴAT