Qostanaı oblysyndaǵy barlyq mektep beınebaqylaý júıesimen qamtylǵan - ákim

NUR-SULTAN. QazAqparat - Qostanaı oblysyndaǵy barlyq mektepter keńjolaqty ınternetke qosylǵan. Bul týraly búgin Ortalyq kommýnıkatsııalar qyzmetindegi baspasóz máslıhatynda óńir ákimi Arhımed Muhambetov aıtty, dep habarlaıdy QazAqparat tilshisi.

«Bilim berý salasyn qarjylandyrý jyl saıyn ulǵaıyp kele jatyr. Tek osy jyly ǵana onyń kólemi 1,5 ese artyp, 122,8 mlrd teńgeni qurady. Bıyl Áýlıekól aýdanyna qarasty Amanqaraǵaı aýylynda 320 orynǵa arnalǵan memlekettik tilde bilim beretin mektep ashyldy. Jeltoqsanda Qostanaı qalasynda memlekettik jáne orys tilderinde bilim beretin 1200 oryndyq mektep «ıÝbıleınyı» shaǵyn aýdanynda paıdalanýǵa beriledi. Sonymen qatar Qarasý aýdanynyń Qarasý aýylynda memlekettik tildegi 320 oryndyq mektep qurylysy júrgizilip jatyr», - dedi oblys ákimi.

Onyń aıtýynsha, bıyl óńirde bilim berý nysandaryn jóndeýge 11,2 mlrd teńge qarjy bólindi. Atalǵan somaǵa 133 mektep kúrdeli jáne aǵymdyq jóndeýden ótkizildi. Mektepterdiń barlyǵy beınebaqylaý júıesimen tolyq qamtyldy. Oǵan oblys bıýdjetinen 187,2 mln teńge jumsaldy.

«2020 jyly bilim berý salasynda koronavırýstyń taralýyna qarsy kúresti kúsheıtý aıasynda 94 myń mektep oqýshysy men tehnıkalyq jáne kásiptik bilim berý júıesiniń 20 myńnan astam stýdenti qashyqtan oqytýǵa kóshirildi. Qashyqtan oqytýǵa sapaly jaǵdaı jasaý maqsatynda 3,8 mlrd teńgege 21 myń kompıýter satyp alyndy. Pedagogtardyń kompıýterlik tehnıkamen qamtamasyz etiýli 100 paıyzdy quraıdy. Oblystaǵy barlyq jalpy bilim beretin mektepter keńjolaqty ınternetke qosylǵan», - dedi Arhımed Muhambetov.