Kóshpendiler oıyny: Qazaqstan men Qyrǵyzstan kókparshylary fınalda kezdesedi

2022 jylǵy 1 qazan, 21:11
Kóshpendiler oıyny: Qazaqstan men Qyrǵyzstan kókparshylary fınalda kezdesedi

IZNIK. QazAqparat - Túrkııanyń Iznık qalasynda ótip jatqan Dúnıejúzilik kóshpendiler oıyndarynda qazaqstandyq kókparshylar fınalǵa shyqty, dep habarlaıdy QazAqparat tilshisi.

Qazaqstandyq kókparshylar búgin Mońǵolııamen kúsh synasty. Saıys barysynda el quramasynyń basymdyǵy baıqalyp turdy. Salym salýdan alda turdy. Nátıjesinde qarsylasynan 12:2 esebimen basym tústi.

Qazaqstandyq kókparshylar budan buryn Ózbekstandy 8:1 esebimen tize búktirdi .

Osylaısha olar fınalǵa joldama aldy. Endigi qarsylasy - Qyrǵyzstan quramasy.

Sondaı-aq, búgin jamby atý (at ústinde sadaq atý) sporty boıynsha júldeler sarapqa salyndy. Saıysta álemniń 21 elinen 75 sportshy baq synady .

«Úsh stıl boıynsha jarysta Eralhan Aıkóz alǵashqy bestikten kórindi. Ol «qabaq» atýdan (túrik stıli) kúmis júlde ıelense, «tabla» atýdan (túrik stıli) qola júlde aldy. Vengr stılinde nysanadan múlt ketken Eralhan jalpy esepte besinshi orynǵa turaqtady», - dedi Ulttyq sport túrleri ortalyǵynan.

Eske salsaq, budan buryn atalǵan dodada Qanat Qasymhan dástúrli sadaq atýdan «kúmis» aldy.

Foto: Ulttyq sport túrleri ortalyǵy


Tegı:
Sport   Túrkııa  
Seriktester jańalyqtary

Jańalyqtar