Koronavırýs: Almatyda telemedıtsına ortalyǵy quryldy

ALMATY. QazAqparat - Almaty ákimi Baqytjan Saǵyntaevtyń tapsyrmasymen qalada pandemııanyń yqtımal jańa tolqynyna daıyndyqty qamtamasyz etý boıynsha sharalar qabyldanyp jatyr, dep habarlaıdy QazAqparat tilshisi.

Qalanyń densaýlyq saqtaý júıesiniń aldynda KVI boıynsha epıdemııalyq jaǵdaı asqynǵan kezde naýqastar men vırýs tasymaldaýshylarynyń barynsha ýaqtyly medıtsınalyq kómekpen jedel qamtý mindeti qoıyldy.

Qala boıynsha 7011 tósek-oryn daıyndaldy. Onyń ishinde 250 oryn jansaqtaý bóliminde daıyndaldy. 23 COVID statsıonary daıyndaldy. 2 jańa klınıkanyń qurylysy aıaqtaldy. 500 tósek-orynǵa arnalǵan ınfektsııalyq gospıtal, 300 tósek-orynǵa arnalǵan jańa modýldi statsıonar jasaqtaldy. Osylaısha sońǵy úsh aıda ınfektsııalyq tósek-oryn sany eki ese kóbeıdi.

Alǵashqy medıtsına-sanıtarlyq kómek jumysy kúsheıtildi. Bul uıymdarynda «taza» jáne «las» aımaqtar qurylyp, aǵyndar bólindi. Epıdemııaǵa qarsy rejımdi, aımaqtarǵa bólýdiń saqtalýy boıynsha baqylaý kúsheıtildi. 73 emhanada 298 mobıldi brıgada qyzmet etedi. Telemedıtsına ortalyǵy quryldy.

Farmpreparattar jáne medıtsınalyq ónimder boıynsha 10 mlrd teńgege turaqtandyrý qory jumys isteıdi. Turaqtandyrý qorynyń sheńberinde 2021 jyldyń aqpanyna deıingi eseppen 68 ataý boıynsha dárilerdiń qajetti qory quryldy. 2021 jyldyń 31 qańtaryna deıin keminde 40 mln dana dári-dármek pen medıtsınalyq ónimderdi jetkizý josparlanyp otyr. Qajet bolǵan jaǵdaıda farmatsevtıkalyq preparattardy naryqqa jetkizý úshin paıdalanylatyn 8 mln dana dáriniń tómendetilmeıtin eń az qory saqtaldy. Sonymen birge qalada dárihanalarǵa kún saıyn dárilik preparattar men jeke qorǵanys quraldarynyń bar-joǵyna monıtorıng júrgiziledi.

Medıtsına qyzmetkerlerdiń qaýipsizdigi men daıyndyǵyna erekshe nazar aýdarylǵan. Jeke qorǵanys quraldarynyń eki aılyq qory jasalǵan. Qalada medıtsınalyq betperdelerdi shyǵaratyn 6 iri otandyq óndirýshi bar. Óndiris qýaty — 882 myń maska.

Densaýlyq saqtaý uıymdaryn medıtsınalyq mamandarmen qamtamasyz etýge erekshe kóńil bólinip jatyr. Epıdemııaǵa qarsy sharalarǵa jumyldyrylǵan medıtsına qyzmetkerlerinen bólek, 2450 mamannan quralǵan kadrlyq rezerv daıyndaldy. Sonymen birge, medıtsınalyq joǵary oqý oryndarynyń oqytýshylary, rezıdentteri, dáriger-ınternderinen rezerv quryldy.

43,1 mlrd teńge somasyna klınıkalardy medıtsınalyq jabdyqtarmen jańartý jáne tolyq jaraqtandyrý júrgizildi.

COVID-19 aldyn alý jelisi boıynsha zerthanalardyń daıyndyǵy qamtamasyz etildi. Qalada 18 PTR zerthanasy bar. Olarda táýligine 14 050 zertteý júrgiziledi. Sonymen birge, táýligine 1152 zertteý qýattylyǵy bar 12 IFT zerthanasy qyzmet etedi.