Koreıada bir kúnde 170 myń adamnan koronavırýs anyqtalyp, jańa antırekord tirkeldi
2022 jylǵy 23 aqpan 16:53

Koreıada bir kúnde 170 myń adamnan koronavırýs anyqtalyp, jańa antırekord tirkeldi

SEÝL. YONHAP-QazAqparat – Ońtústik Koreıada koronavırýs juqtyrǵandar sany kúrt artyp, sársenbi kúni 170 myńǵa jetti, dep habarlaıdy QazAqparat YONHAP agenttigine silteme jasap.

Koreıanyń aýrýlardy baqylaý jáne aldyn alý agenttiginiń (KDCA) derekterine saı, elde 171 452 adam vırýs juqtyrǵan, olardyń ishinde 171 271 jaǵdaı – jergilikti. Osylaısha, koronavırýsqa shaldyqqandar sany 2 329 182-ge jetti.

Bir kún buryn bul kórsetkish 99 572 bolǵan, jeksenbi kúni tirkelgen rekord boıynsha, 104 814 adamnan vırýs anyqtalǵan.

Ońtústik Koreıada ótken aıdyń aıaǵynda omıkron shtamyn juqtyrý jaǵdaılary kúrt kóbeıdi. Jańa antırekordtyń sebebi de osy.

COVID-19-dan qaıtys bolǵandar sany 7 607-ge jetti, bul seısenbi kúngi kórsetkishten 99-ǵa kóp. Qazirgi kezde Ońtústik Koreıa – táýliktik ólim sany boıynsha tórtinshi orynda.

Densaýlyq saqtaý organdarynyń málimdeýinshe, kelesi aıdyń basynda «omıkron» tolqyny shyńyna jetip, táýligine 270 myń adamnan vırýs anyqtalmaq. Sarapshylardyń boljaýynsha, ol kezge deıin aýyr jaǵdaılar sany 1 myńnan asatyn bolady.


Uqsas jańalyqtar

Jańalyqtar

Úrdis

MURAǴAT