Kólik salasynda bazalyq sharttarǵa sáıkes kelmeıtin 128 normatıv joıyldy
2022 jylǵy 1 shilde 13:12

Kólik salasynda bazalyq sharttarǵa sáıkes kelmeıtin 128 normatıv joıyldy

NUR-SULTAN. QazAqparat - QR Indýstrııa jáne ınfraqurylymdyq damý mınıstrliginde vıtse-mınıstr Almaz Ydyrysovtyń tóraǵalyǵymen kólik salasynda jańa retteýshilik saıasatty engizý máseleleri jónindegi jumys tobynyń qorytyndy otyrysy ótti, dep habarlaıdy QazAqparat.

«Atameken» Ulttyq Kásipkerler palatasy sarapshylarynyń, kólik salasyndaǵy qaýymdastyqtar men bıznes-qoǵamdastyqtyń ókilderiniń qatysýymen ótken alqaly jıynda memlekettik retteýdiń problemalyq máseleleri talqylandy. Sondaı-aq kásipkerlik qyzmetti retteýdiń «taza paraqtan» jańa tásilderine sáıkes normatıvtik-quqyqtyq bazany jetildirý júıesi nazarǵa alyndy.

Jumys toby jyl basynan beri azamattyq avıatsııa, avtomobıl, temirjol jáne sý kóligi salalaryn retteıtin 283 normatıvtik quqyqtyq aktini qaıta qaraǵan. Nátıjesinde 4 615 talap túzetýdi talap etpeıtindigi jáne azamattyq avıatsııa salasyndaǵy halyqaralyq praktıkaǵa (ICAO standarttaryna) jáne sý kóligi salasyndaǵy halyqaralyq sharttarǵa (BUU, IMO, HEU) sáıkes keletindigi anyqtaldy. Osyǵan oraı atalǵan qujattarǵa túzetýler engizilgen joq.

Sonymen qatar 1 092 normatıv bazalyq sharttarǵa sáıkes kelmeıtindigi anyqtaldy. Onyń 950-i ózgertýdi (tolyqtyrýdy) talap etse, joıýdy talap etetin normatıv sany 128-di quraıdy.

Otyrys qorytyndysy boıynsha kásipkerlik sýbektilerine qoıylatyn mindetti talaptardyń aldyn ala tizbesin qalyptastyrý, sondaı-aq azamattyq avıatsııa jáne sý kóligi salalaryndaǵy bólek belgilengen birqatar máselelerdi kishi toptardyń otyrystarynda bıylǵy jyldyń 1 shildesine deıin qaıta qaraý týraly sheshim qabyldandy.

Tizilimde Memlekettik organ talaptarynyń jańa retteýshi saıasatqa sáıkestigi turǵysynan qaıta qaralý merzimde aıqyndalyp, osy baǵyttaǵy jumys turaqty negizde jalǵasatyn bolady.

Budan buryn habarlanǵandaı, tizilim 2023 jylǵy 1 qańtardan bastap qoldanysqa engizilmek. Ol bıznes ortaǵa teris áser etetin talaptarǵa qatysty «Retteýshi gılotına» ádisin qoldanýǵa múmkindik beredi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT