Kóktemgi sý tasqyny: Elorda aýmaǵyna ushaqpen sholý jasaldy

NUR-SULTAN. QazAqparat - Búgin sý tasqyny jaǵdaıyna monıtorıng jasaý maqsatynda elordanyń shekara mańyndaǵy aýmaqtaryn ushaqpen sholý júrgizildi. Bul týraly QazAqparat QR ІІM TJK baspasóz qyzmetine silteme jasap habarlaıdy.

28 naýryz kúni QR Іshki ister mınıstriniń orynbasary ıÝrıı Ilın, Tótenshe jaǵdaılar komıteti, EGTPM Sý resýrstary komıteti, «Kazgıdromet» RMK ókilderi elordanyń shekara mańyndaǵy aýmaqtaryna ushaqpen sholý jasady.

«Sholý barysynda Astanalyq sýrettegishke, Vıacheslav sý qoımasyna, Qajymuqan, Talapker, Qaraótkel, Ilınka, Taıtóbe, Qosshy, Qoıandy, Preobrajensk, Qoshqarbaev, Qabanbaı batyr eldi mekenderiniń aýmaqtaryna aerovızýaldy tekserý júrgizildi», - delingen baspasóz habarlamasynda.

Anyqtalǵandaı, aýmaqtyń kóp bóliginde qar erý protsesi turaqty júrip jatyr. Sonymen qatar, atalmysh sholý jumysy Astana sý qoımasyndaǵy sý aǵynyn aldyn ala esepteýge múmkindik berdi.

«Eń aldymen, biz Astana sý qoımasy tolýynyń jaı-kúıin baıqadyq. Qazir bul sý qoımasy 53% toldy, taǵy 200 mln jýyq tekshe metr qor bar. Búgin baıqaǵanymyzdaı, sý qory men qar jabynyn esepke ala kele, bógette 100% sý qory jınalady dep boljap otyrmyz. Nur-Sultan qalasynyń turǵyndary sýsyz qalmaıdy», - dedi ıÝrıı Ilın.

«Qazgıdromet» RMK boljamy boıynsha kelesi aptada kúndiz jáne túnde aýa temperatýrasy joǵarylaıdy, sondyqtan da qar qarqyndy erıdi dep kútilýde. Jer serigi arqyly qashyqtyqtan zondtaý arqyly da táýlik boıy monıtorıng júrgiziledi.

«Kúshter men quraldardyń qosymsha tobyn biz kelesi aptanyń sońyna qaraı ońtústik óńirlerden ortalyq óńirlerge, atap aıtqanda, Aqmola jáne Soltústik Qazaqstan oblystaryna kóshirýge daıynbyz», - dedi ıÝrıı Ilın.