Kókshetaýlyq stýdentterge Qazaqstanda shyǵarylǵan noýtbýkter tabys etildi
2021 jylǵy 16 aqpan 14:49

Kókshetaýlyq stýdentterge Qazaqstanda shyǵarylǵan noýtbýkter tabys etildi

KÓKShETAÝ. QazAqparat - Shoqan Ýálıhanov atyndaǵy Kókshetaý ýnıversıteti «S.M.Kırov atyndaǵy zaýyt» aktsıonerlik qoǵamymen birlesip, áleýmettik jaǵynan osal toptaǵy stýdentterge qoldaý kórsetý maqsatynda noýtbýkter tapsyrdy, dep habarlaıdy QazAqparat tilshisi.

Búgingi tańda atalmysh bilim ordasynda ata-anasynyń qamqorlyǵynsyz qalǵan 6 jetim stýdent bilim alýda. Ýnıversıtet rektory Marat Syrlybaevtyń bastamasy boıynsha jetim stýdentterge qoldaý kórsetý maqsatynda «S.M.Kırov atyndaǵy zaýyt» aktsıonerlik qoǵamy demeýshilik kómek kórsetip otyr. Qazirgi kezde kompanııa jańa úlgidegi kompıýter tehnıkasy sııaqty otandyq ónimderdi shyǵarady. Zaýyttyń tarıhy Ekinshi dúnıejúzilik soǵystan bastaý alady. Soǵys jyldarynda zaýyt ujymy maıdandy jaýyngerler arasynda úlken suranysqa ıe bolǵan radıoqabyldaǵyshtarmen jáne radıopelengatorlarmen qamtamasyz etti. Soǵystan keıin zaýyt halyq sharýashylyǵy men halyqtyń qajettilikteri úshin radıoqabyldaǵyshtar shyǵarýǵa kóshti. Búgingi tańda atalmysh zaýyt «Qazaqstan ınjınırıng» ulttyq kompanııasy» aktsıonerlik qoǵamynyń quramyndaǵy memlekettik iri kásiporyn. Zaýyttyń shyǵarylatyn ónim spektri ár túrli.

«Bizdiń kásiporynnyń ZIK Computers markaly kompıýterlik tehnıkany shyǵara bastaǵanyna eki jyl boldy. Osy aralyqta 55 myńǵa jýyq tehnıka qurastyryldy. Onyń 2000 danasyn tehnıkalyq baıqaý men testen ótkizilgennen soń Soltústik Qazaqstan oblysynyń aýdandary men qalalaryna jiberdik. Jaqynda Shoqan Ýálıhanov atyndaǵy Kókshetaý ýnıversıteti basshylyǵy tarapynan bizge áleýmettik jaǵynan osal toptaǵy stýdentterge qoldaý kórsetý týraly usynys tústi. Biz ony birden qoldadyq», - dep atap ótti «S.M.Kırov atyndaǵy zaýyt» aktsıonerlik qoǵamy bas dırektorynyń kommertsııalyq máseleleri boıynsha orynbasary Qaırat Álibekov.

Elimizdegi irgeli kásiporyn basshylyǵyna ýnıversıtet ujymy men stýdentteri atynan alǵysyn aıtqan ýnıversıtettiń áleýmettik – mádenı damý boıynsha prorektory, Ádep jónindegi ýákil, qoǵam qaıratkeri Ǵalym Baıtyq mundaı ıgi isterdiń odan ári jalǵasyn taba beretinin atap ótti.

«Bizdiń usynysymyzǵa qulaq asyp, qoldaý bildirip otyrǵan «S.M.Kırov atyndaǵy zaýyt» aktsıonerlik qoǵamynyń basshylyǵyna ýnıversıtet rektory atynan shynaı rızashylyǵymyzdy bildiremin. Búgingi kúni pandemııa kezinde qashyqtan bilim alyp jatqan stýdentter úshin noýtbýk óte qajet. Bul bizdiń stýdentter úshin úlken kómek. Osyndaı qoldaý aldaǵy ýaqytta da bolady dep senemiz», - dedi Ǵalym Baıtyq.

Osy rette, otandyq noýtbýkke ıe bolǵan stýdentterde qýanyshtarymen bólisti.

«Búgingi qýanyshymda shek joq. Qashyqtan bilim alyp jatqan bizderge noýtbýk aýadaı qajet. Jaqsy istiń jarshysy bolyp otyrǵan otandyq zaýyt pen elimizdegi irgeli oqý ornynyń basshylary alǵysymdy bildiremin. Sapaly bilim alyp, keleshekte elimizdiń damýyna eleýli úles qosyp, ustazdarymnyń úmitin aqtaýǵa tyrysamyn», - dedi ýnıversıtettiń fılologııa jáne pedagogıka kafedrasynyń 1-shi kýrs stýdenti Vera Nurysheva.

Sonymen birge, zaýyt sybaılas jemqorlyqqa qarsy «AntiParaCraft» kvest-oıyny jobasyna da qoldaýǵa bildirip otyr.

Aıta keteıik, «AntiParaCraft» kvest-oıyny pılottyq joba bolyp tabylady jáne elimizde alǵash ret engizilýde. Shoqan Ýálıhanov atyndaǵy Kókshetaý ýnıversıteti osy ıdeıanyń avtory jáne jańashyly bolyp tabylady. Joba QR Sybaılas jemqorlyqqa qarsy qyzmeti tarapynan qoldaý taýyp otyr.



Jańalyqtar

MURAǴAT