Kókshetaýdaǵy jylý kózderin sapaly jóndeý mindeti tur – Úkimet basshysy
2022 jylǵy 27 mamyr 15:57

Kókshetaýdaǵy jylý kózderin sapaly jóndeý mindeti tur – Úkimet basshysy

NUR-SULTAN. QazAqparat – Jylýmen qamtamasyz etý – Kókshetaý qalasy úshin mańyzdy máselelerdiń biri. Aqmola oblysyna jumys saparymen barǵan QR Premer-Mınıstri Álıhan Smaıylov osy oraıda qaladaǵy jylý kózderin sapaly jóndeý mindeti turǵanyn aıtty, dep habarlaıdy QazAqparat Úkimettiń resmı saıtyna silteme jasap.

Úkimet basshysy №2 «Kókshetaý Jylý» MKK aýdandyq qazandyǵynyń jumysyn tekserdi. Óndiristik qýaty - shamamen 300 Gkal/saǵ, qazandyq 1998 jyly paıdalanýǵa berilgen.

Premer-Mınıstr jylytý maýsymynda Kókshetaýdyń jylý kózderinde tehnologııalyq aqaýlar tirkelgenin, sondaı-aq aýyz sýdyń sapasy boıynsha da problemalar bolǵanyn atap ótti.

«Jylýmen qamtamasyz etý – Kókshetaý qalasy úshin mańyzdy máselelerdiń biri. JEO qurylysy boıynsha ınvestıtsııalyq jobany belsendi túrde ilgeriletip, konkýrstyq rásimder ótkizip, ınvestordy jáne qarjylandyrý modelin aıqyndaý qajet. Jobany júzege asyrýǵa kóp ýaqyt ketedi, sondyqtan oblys aldynda qaladaǵy jylý kózderine sapaly jóndeý jumystaryn júrgizý mindeti tur», - dedi Álıhan Smaıylov.

Energetıka mınıstrligine ákimdikpen birlesip, áleýmettik mazýt satyp alý máselesin pysyqtaý tapsyryldy.

Sondaı-aq, Úkimet basshysy oblys ortalyǵyndaǵy sý tazartý qondyrǵylaryn rekonstrýktsııalaý jobasynyń 13 jyldan astam ýaqyt iske asyrylyp jatqanyna nazar aýdardy. Osy oraıda, Indýstrııa jáne ınfraqurylymdyq damý mınıstrligine Qarjy mınıstrligimen jáne oblys ákimdigimen birlesip, jumystardy aıaqtaý úshin bıýdjetten qarajat bólý múmkindigin pysyqtaý tapsyryldy.

Sonymen qatar, Premer-Mınıstr jumys sapary aıasynda «Viamedis» JShS jańa klınıkalyq-ońaltý ortalyǵynda boldy. Ortalyq bazasynda bir aýysymda 250 adamdy qabyldaıtyn emhana, statsıonarlyq ońaltý bólimshesi, kúndizgi, hırýrgııalyq jáne terapııalyq statsıonarlar jumys isteıdi.

Álıhan Smaıylov óńirdiń densaýlyq saqtaý salasynyń damýy týraly baıandamany tyńdady. Oblystaǵy jalpy ólim-jitim 10,3%-ǵa artqan. Ana ólimi, qan aınalymy júıesi aýrýlarynan bolatyn ólim-jitim boıynsha da jaǵdaı osyndaı.

«Ákimdik osy problemalardy sheshýge basa nazar aýdarýy kerek, sondaı-aq densaýlyq saqtaý salasyna jas kadrlardy tartý jumysyn kúsheıtýi qajet», - dedi Úkimet basshysy.

Premer-Mınıstr jumys sapary barysynda ártúrli polıpropılen ydysyn shyǵaratyn «Novopek» JShS fabrıkasyna da bardy. Kásiporyn zamanaýı jabdyqtarmen qamtamasyz etilgen. Óndiris tehnologııasy boıynsha fabrıka álemdik standarttardyń barlyq talaptaryna saı jáne polıpropılen ydystaryn shyǵarý boıynsha BUU sertıfıkatyn alǵan. Kompanııanyń ónimderine ishki naryqta, sondaı-aq Tájikstan, Ózbekstan jáne Reseı Federatsııasy elderinde suranys bar. Aldaǵy ýaqytta TMD-nyń basqa memleketterinde naryqqa shyǵý josparlanyp otyr.

Álıhan Smaıylov Úkimettiń ekonomıkany ártaraptandyrý, óndiriletin taýarlardyń nomenklatýrasyn keńeıtý jáne kúrdelendirý, sondaı-aq otandyq óndirýshilerdi shıkizatpen qamtamasyz etý jumystaryn jalǵastyryp jatqanyn jetkizdi.

Odan ári Álıhan Smaıylov «Gormolzavod» JShS-niń sút ónimderin daıyndaý, qaıta óńdeý jáne satý jónindegi qyzmetimen tanysty.

«Aqmola oblysynda negizinen tamaq ónimderiniń óndirisi jaqsy damyǵan. Óńirdiń jetkilikti mólsherde mal azyǵyn daıyndaý múmkindigin eskere otyryp, sútti mal sharýashylyǵyn, sonyń ishinde sút óńdeý salasyn belsendi damytýǵa bolady», - dep atap ótti Premer-Mınıstr.

Sonymen qatar, Álıhan Smaıylov Úkimet ishki naryqta otandyq óndirýshilerdi yntalandyra otyryp, sút ónimderi ımportynyń kólemin maqsatty túrde qysqartýǵa basymdyq berip otyrǵanyn aıtty.

«Bul úshin selektsııalyq jáne asyl tuqymdyq jumysty sýbsıdııalaý jáne sút óndirisiniń qunyn arzandatý boıynsha memlekettik qoldaýdyń barlyq sharalary saqtalǵan. Oblys ákimdigi salalyq mınıstrlikpen birlesip, oblystaǵy sút óńdeý kásiporyndarynyń júktemesine erekshe nazar aýdarýy qajet», - dep tapsyrdy Premer-Mınıstr.


Jańalyqtar

MURAǴAT