Kókshetaýda qaza bolǵan polıtseı áıelge eskertkish taqta ornatyldy

KÓKShETAÝ. QazAqparat - Kókshetaý qalasynda qyzmettik mindetin oryndaý kezinde qaza tapqan polıtsııa podpolkovnıgi Botagóz Bıjanovanyń qurmetine eskertkish taqta ornatyldy, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.

Vedomstvonyń dereginshe, Aqmola oblysynyń PD emhanasy ornalasqan gospıtalge ornatylǵan eskertkish taqtanyń ashylýyna oblystyq PD bastyǵy Berik Bılıalov pen departamenttiń jeke quramy jáne Botagóz Maǵazqyzynyń týǵan-týystary, burynǵy áriptesteri qatysty.

Jıynda Aqmola oblysynyń PD bastyǵy Berik Bılıalov sóz sóılep, Botagóz Bıjanovanyń azamattyq ustanymy men kisilik kelbetin, qyzmetine degen adaldyǵyn, sanaýly da ǵıbratty ǵumyryn tilge tıek etti.

«Anamdy umytpaı, eske alyp, osyndaı qurmet kórsetip jatqandaryńyzǵa shynaıy alǵysymdy bildiremin», - dedi marqumnyń qyzy Dınara Eralyqyzy.

Aıta ketesek, Botagóz Maǵazqyzy 1961 jyly shildeniń 18 kúni Tselınograd oblysynyń Esil aýdanynda dúnıege kelgen. 1978 jyly Arqalyq qalasyndaǵy nómeri 4 orta mektepti, 1978-1985 jyldar arlyǵynda Qaraǵandy medıtsınalyq ıntıtýtyn «Emdeý isi» boıynsha támámdaǵan. Eńbek jolyn qalalyq polıklınıkada ýchaskelik dáriger bolyp bastaǵan. Keıin Іshki ister departamentinde ártúrli laýazymda qyzmetter atqarǵan.

Ókinishke qaraı, 2001 jyly 28 maýsymda óz úıiniń kire berisinde oǵan qastandyq jasalyp, qaza tapty. Artynsha kúdiktiler ustalyp, tutqyndalady.