Kókshetaýda 630 oryndyq zamanaýı aýrýhana salynady - Ermek Marjyqpaev
2022 jylǵy 27 maýsym 17:18

Kókshetaýda 630 oryndyq zamanaýı aýrýhana salynady - Ermek Marjyqpaev

BÝRABAI. QazAqparat - Kókshetaýda memlekettik-jekemenshik áriptestik aıasynda 630 oryndyq zamanaýı kópbeıindi aýrýhana salynady. Bul týraly óńirdiń áleýmettik-ekonomıkalyq damýyna arnalǵan baspasóz máslıhatynda aımaq basshysy Ermek Marjyqpaev málim etti, dep habarlaıdy QazAqparat tilshisi.

Baspasóz máslıhatynda aımaq basshysy óńirde halyqty sapaly medıtsınalyq qyzmetpen qamtamasyz etý boıynsha qolǵa alynǵan jumystarǵa toqtaldy.

«Óńirde densaýlyq saqtaý nysandarynyń materıaldyq-tehnıkalyq bazasy jaqsaryp keledi. Onyń ishinde 2,2 mlrd teńgege 150 medıtsınalyq tehnıka satyp alyndy. Bıyl «reanımatsııa», «hırýrgııa», «oftalmologııa» beıinderin jabdyqtaý úshin 32 medıtsınalyq jabdyq satyp alý josparlanǵan. Budan bólek, Kókshetaý qalasynda memlekettik-jekemenshik áriptestik aıasynda 630 oryndyq zamanaýı kópbeıindi aýrýhana salynady. Bul joba óńir úshin óte mańyzdy. Qazir daıyndyq sharalary júrip jatyr, Saryarqa shaǵynaýdanynda aýrýhana qurylysy úshin 17 gektar jer telimi bólindi»,-dedi Ermek Marjyqpaev.

Aımaq basshysy atap ótkendeı, bıyl Qosshy qalasynda 100 kelýshige arnalǵan emhana qurylysy jáne Qoıandy aýylyna 50 kelýshige arnalǵan alǵashqy medıtsınalyq-sanıtarlyq kómek ortalyǵynyń qurylysy aıaqtalmaqshy.

Buǵan qosa, Atbasar aýdanynda 2 medıtsınalyq mekeme salý qarastyrylǵan.

Aıta ketsek, budan buryn Aqmola oblysynyń Taıtóbe aýylyndaǵy zańsyz qoqys polıgony joıylatynyn jazǵan bolatynbyz.


Jańalyqtar

Úrdis

MURAǴAT