Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń otyrysy ótti

NUR-SULTAN. QazAqparat - Memlekettik hatshy Qoǵamdyq sanany jańǵyrtý baǵdarlamasyn iske asyrý jónindegi Ulttyq komıssııanyń otyrysyn ótkizdi, dep habarlaıdy QazAqparat Aqordaǵa silteme jasap.

Uqsas jańalyqtar

Bıyldan bastap 500 qazaqstandyq ǵalym memleket esebinen shetelde taǵylymdamadan ótedi

Qyrymbek Kósherbaevtyń tóraǵalyǵymen Qazaqstan Respýblıkasy Prezıdentiniń janyndaǵy Qoǵamdyq sanany jańǵyrtý baǵdarlamasyn iske asyrý jónindegi Ulttyq komıssııanyń otyrysy ótti. Beınebaılanys formatynda ótken otyrysta baǵdarlamany iske asyrýdyń aǵymdaǵy qorytyndylary talqylanyp, odan ári atqarylatyn jumystyń basym baǵyttary aıqyndaldy.

Qyrymbek Kósherbaev otyrysty asha kele, Memleket basshysy Qasym-Jomart Toqaev «Táýelsizdik bárinen qymbat» baǵdarlamalyq maqalasynda Tuńǵysh Prezıdent – Elbasy Nursultan Nazarbaev bastamashy bolǵan «Rýhanı jańǵyrý» baǵdarlamasyn odan ári damytýdyń qundy baǵdarlaryn aıqyndaǵanyn atap ótti. Birinshiden, Táýelsizdigimizdiń qasterli qundylyqtaryn qorǵaý men qasterleý, ekinshiden, qoǵamdyq damýdyń ózekti máseleleri boıynsha naqty memlekettik ustanym ekenin aıtty.

Memlekettik hatshy jahandanýdyń zamanaýı syn-qaterleri men tegeýrinderi jaǵdaıynda «Rýhanı jańǵyrý» baǵdarlamasy adam kapıtalyn damytýdyń basty baǵdary ári qoǵam úshin jańa ıdeologııalyq kún tártibin qalyptastyrýdyń tetigi ekenin jetkizdi.

Premer-Mınıstrdiń orynbasary Eraly Toǵjanovtyń aıtýynsha, 2020 jyly «Rýhanı jańǵyrý» baǵdarlamasynyń Іs-sharalar josparyn júzege asyrý aıasynda 8 mıllıonnan astam adam qamtylǵan 30 000 is-shara ótkizilgen. Baǵdarlamany iske asyrýdyń jańa qundy tásilderi men tetikteri sharalardyń aıasyn úsh negizgi baǵyt boıynsha keńeıtýge múmkindik berdi. Atap aıtqanda: «Tulǵalyq damý», «Ulttyq biregeılik jáne halyqaralyq mártebeni arttyrý», «Memlekettiń, azamattyq qoǵamnyń jáne jergilikti qoǵamdastyqtardyń damýy». Sonymen qatar arnaıy 4 jańa joba engizildi. Olar: «Únem – qoǵam qýaty», «Dástúr men ǵuryp», «Quqyqtyq mádenıet» jáne «Eńbek – eldiń muraty».

«Týǵan jer» arnaıy jobasynyń aıasynda ótken jyly otandyq metsenattar negizgi aımaqtyq ınfraqurylymdyq obektilerdi damytýǵa 10 mlrd teńge kóleminde qarjy bólip, áleýmettik mańyzy bar 537 nysan salyp, 445 nysanǵa jóndeý jumystaryn júrgizdi.

Otyrysqa qatysýshylarǵa Qoǵamdyq sanany jańǵyrtý baǵdarlamasyn iske asyrýdyń arnaıy Jol kartasy usynyldy.

Jıynda talqylanǵan máseleler boıynsha belgili ǵalym, tarıh ǵylymdarynyń doktory, professor Talas Omarbekov, «Ulttyq kınony qoldaý memlekettik ortalyǵy» KEAQ Basqarma tóraǵasy Esetjan Qosýbaev, Shyǵys Qazaqstan oblysy Borodýlıha aýdanynyń metsenaty Konstantın Pop, QR Prezıdentiniń «Bolashaq» halyqaralyq stıpendııasy stıpendıattary qaýymdastyǵynyń atqarýshy dırektory Laýra Demesınova sóz sóıledi.

Otyrys qorytyndysy boıynsha Úkimetke «Rýhanı jańǵyrý» baǵdarlamasynyń 2021 jylǵa arnalǵan Jol kartasyn sapaly ári tıimdi iske asyrýdy qamtamasyz etý boıynsha birqatar tapsyrma berildi.

Memlekettik hatshy Ulttyq komıssııanyń usynystary men usynymdaryn qarastyrýdy tapsyrdy. Atap aıtqanda, Qazaqstannyń tolyq akademııalyq tarıhyn jazý úshin «Halyq tarıhy» atty jobalyq keńseni ashý, «Kınodaǵy jáne teledıdardaǵy tarıh» atty arnaıy jobanyń taqyryptaryn kúsheıtý, «Kıeli Qazaqstan» arnaıy jobasy aıasynda týrızmdi damytý, otandyq Saılaýshylar bankin qalyptastyrý. Ásirese balalar men jasóspirimder úshin sapaly mádenı-aǵartýshylyq jáne bilim berý kontentin qalyptastyrý qajettiligine nazar aýdaryldy.