+7 (701) 759 90 19
USD 411.54 EUR 458.13
RUB 5.84 CNY 57.64
Jańalyqtar

QKHP Prezıdenttiń málimdemesindegi aıtylǵan mindetterdi sapaly oryndaýǵa shaqyrdy

2020 jylǵy 1 sáýir 16:07
Bólisińiz:
QKHP Prezıdenttiń málimdemesindegi aıtylǵan mindetterdi sapaly oryndaýǵa shaqyrdy

NUR-SULTAN. QazAqparat - Qazaqstan Kommýnıstik halyq partııasy Qazaqstan Respýblıkasy Prezıdentiniń 31 naýryzdaǵy qazaqstandyqtarǵa qoldaý kórsetýdi qamtamasyz etý týraly málimdemesine oraı óz ustanymyn jarııalady. «QazAqparat» HAA qujattyń tolyq mátinin usynady.

Qazaqstan Kommýnıstik halyq partııasynyń Qazaqstan Respýblıkasy Prezıdentiniń 2020 jylǵy 31 naýryzdaǵy málimdemesine qatysty resmı ustanymyn

Qurmetti qazaqstandyqtar!

Qazaqstan Kommýnıstik halyq partııasy eldegi jaǵdaıǵa alańdaýshylyq bildire otyryp, Qazaqstannyń osy ýaqytqa deıin mundaı aýqymdaǵy indetke tap bolmaǵanyn jetkizedi. Qus tumaýy, shoshqa tumaýy, SARS sekildi indetterdiń barlyǵy bizdi aınalyp ótti. Biraq bul bizdiń Úkimettiń pandemııaǵa qarsy daıyndyǵynyń tómendigin aqtaı almaıdy. Daıyndyqtyń tómendigi negizgi qyzmetterdiń qurylymynan-aq baıqalyp tur.

Tótenshe jaǵdaıdan qorǵaýdy úılestirý jeke mınıstrlikten komıtet deńgeıine ótti. Bul rette ýákiletti organ ortalyq jáne jergilikti atqarýshy organdar úshin mindetti sheshim qabyldaýy kerek!

Sanıtarlyq-epıdemıologııalyq qorǵaý fýnktsııalaryn atqaratyn jeke vedomstva joq. Bul fýnktsııalar Densaýlyq saqtaý mınıstrliginiń taýarlar men qyzmetterdiń sapasy men qaýipsizdigin baqylaý komıtetine ótken.

Ókinishke qaraı, tek qazirgi daǵdarys bizdi pandemııamen kúresip jatqan

epıdemıologtardyń, ınfektsıonısterdiń, jedel járdem qyzmetkerleriniń jalaqysy mardymsyz ekenine nazar aýdarýǵa májbúr etti. Bul rette basqa dárigerlerdiń de mártebesi men materıaldyq jaǵdaıy máz emes ekenin aıta ketken jón.

Biz qazir ǵana qarapaıym qorǵanysh quraldary men dári-dármek shyǵara almaıtynymyzǵa, sondaı-aq azyq-túlik qaýipsizdiginiń barlyq máselelerin óz betimizshe sheshe almaıtynymyzǵa kóz jetkizdik. Memlekettik materıaldyq rezerv pen áleýmettik-kásipkerlik korporatsııalary janyndaǵy turaqtandyrý qorlarynyń naqty jaǵdaıyna shynaıy baǵa berdik. Bárimiz osydan oń qorytyndy shyǵaramyz dep senemiz!

COVID-19 indetine shaldyqqandardyń kóbeıýine baılanysty qoǵamda artyp kele jatqan shıelenister jedel jáne keshendi sheshimderdi qajet etedi. Epıdemııaǵa qarsy daıyndyqtyń joqtyǵy shıkizat baǵasyn kúrt tómendetip jibergenin kórdik. Tıisinshe, qoǵamda qordalanǵan máselelerdi sheshý barlyǵymyz úshin qymbatqa túsip jatyr.

Qazaqstan Kommýnıstik halyq partııasy Prezıdent Qasym-Jomart Kemeluly Toqaevtyń qıyn kezeńde halyqqa qoldaý kórsetýdi qamtamasyz etý týraly málimdemesin qarastyryp, qazaqstandyqtardyń ómiri men densaýlyǵyn saqtaýdy birinshi kezektegi mindet dep sanaıdy. Sondyqtan biz osy baǵyttaǵy kez-kelgen is-áreketti qoldaımyz jáne aldaǵy ýaqytta osy ustanymdy ustanamyz.

Aıta ketý kerek, indet oshaǵynda júrgen medıtsına qyzmetkerleri laıyqty jalaqy alatyn bolady. Medıtsına qyzmetkerlerin qoldaý sharalary epıdemııadan keıin de júıeli túrde jalǵasyn tabady dep úmittenemiz. Bul týraly kommýnıster birneshe márte másele kótergen bolatyn.

Bizdiń partııa qazaqstandyqtardy qoldaýǵa baǵyttalǵan keshendi sharalardy tolyǵymen qoldaıdy. Birinshiden, qoldaý kórsetiletin adamdardyń sanyn 1,5 mıllıonnan 3 mıllıonǵa deıin arttyrý durys dep sanaımyz. Bul bizdiń resmı statıstıka jumyspen qamtý jáne kirister týraly naqty jaǵdaıdy kórsetpeıdi degen málimdemeni rastaıdy. Áleýmettik járdemaqy alý azamattar úshin óte mańyzdy bolǵandyqtan, memleket alýshylar sanyna ózgeris engizdi. Bizdiń «ózin-ózi jumyspen qamtyǵandardy» bıznesmender qataryna múldem jatqyzýǵa bolmaıdy degen tezısimiz de rastaldy! Árbir kásipkerde «qaýipsizdik jastyqshasy» bolady. Al «ózin-ózi jumyspen qamtyǵan» adamdarda tek ómir súrýge degen múmkindik qana bar.

Júz myńdaǵan adam kúnkóris kózinsiz qalǵan kezde rastalǵan kiristiń bolýyna qaramastan, tólem alýǵa múmkindik berý oń sheshim boldy. Prezıdent «júz myńdaǵan muqtaj jandardy qaýipti jaǵdaıda qaldyrýǵa bolmaıdy» dep durys aıtty.

Kommýnıster zeınetaqy men memlekettik járdemaqyny jáne ataýly áleýmettik kómekti 10%-ǵa ındeksatsııalaýdy quptaıdy. Memlekettiń halyqqa kórsetetin osyndaı tikeleı kómegi bankterge jasalǵan kómekten áldeqaıda jaqsy. Sonymen qatar medıtsınalyq kómektiń kólemin saqtandyrýdyń bar ne joq ekenine qaramastan 1 shildege deıin uzartý týraly sheshim qabyldandy. Bul shara jyl sońyna deıin sozylady dep úmittenemiz. Óıtkeni pandemııadan keıin turǵyndar ómirin qalypqa keltirýi kerek. Bul edáýir ýaqytty talap etedi.

Parlamentte kommýnıster halyq ıgiligi úshin azyq-túlik qaýipsizdigin qamamasyz etýdiń memlekettik baǵdarlamasyn, aýyl sharýashylyǵy men ónerkásipti damytý sonymen qatar memlekettik áleýmettik kómek baǵdarlamasyn jáne «Qarapaıym zattar ekonomıkasy» arnaıy jobasyn qabyldaý men yqpaldastyrý qajettiligin júıeli túrde kóterip keldi. Memlekettiń halyqqa bóletin bıýdjettik qarajaty sheteldik fermerler men óńdeýshilerdi qarjylandyrmaı, kerisinshe ekonomıkamyzdyń naqty sektoryn yntalandyrýy kerek!

Prezıdenttiń málimdemesinen ekonomıkalyq daǵdarystyń kúsheıýi, álemdegi pandemııaǵa baılanysty dúrbeleń jáne Qazaqstandaǵy tótenshe jaǵdaı durys sheshim qabyldaýǵa alyp kelgenin kórdik. Karantın kezinde Prezıdent otandyq óndiriske nazar aýdara otyryp, áleýmettik osal toptardy qajetti ónimdermen jáne gıgıena zattarymen qamtamasyz etýdi tapsyrdy. Immýnıtettiń álsireýi men durys tamaqtanbaý saldarynan halyqtyń áleýmettik osal tobyna úlken qaýip tónip turǵanyn eskere otyryp, jumysy bola tura, kedeılik sheginde ómir súrý jaǵdaıymen kúresý baǵdarlamasy iske qosylyp, eldegi jumyssyzdyqtyń naqty deńgeıi moıyndalady dep senemiz. Sondyqtan biz tegin azyq-túlik alatyn qazaqstandyqtardyń tizimin 800 myń adamǵa deıin ulǵaıtý týraly sheshimdi tolyǵymen qoldaımyz.

Biz «Jumyspen qamtýdyń jol kartasy» boıynsha «kótermeleý» usynysymen qazaqstandyqtardy jumysqa ornalastyrý sharalaryn baǵaladyq. Eń bastysy, bul jobany júzege asyrý barysynda qazaqstandyqtar úshin sanıtarlyq jaǵdaı laıyqty bolǵanyn qalaımyz. Epıdemııanyń jańa oshaqtaryna jol bermeýimiz kerek jáne oppozıtsııalyq partııa retinde biz jergilikti atqarýshy organdardy Memleket basshysynyń maqsattaryn sapaly oryndaýǵa shaqyramyz.

Kommýnıster únemi nesıe uıymdary men bankter memlekettiń qoldaýyna qaramastan, qıyn jaǵdaıdaǵy adamdardy qýdalaıtynyn Úkimet pen Ulttyq banktiń esine salyp otyrady. Bul tájirıbeni tolyǵymen joıý kerek! Biz aqsha, nesıe berýshilerdi tezge salýǵa baǵyttalǵan barlyq sharalardy tolyǵymen qoldaımyz. Kommýnıster kommertsııalyq bankter men basqa qarjy ınstıtýttary qoǵammen yntymaqtasyp, áleýmettik shıelenisti ýshyqtyrmaýy kerek dep sanaıdy! Eger olar ózderiniń jaýapkershilik deńgeıin túsinbese, olarǵa qatań shara qoldaný qajet!

Prezıdent Qasym-Jomart Kemeluly Toqaevtyń málimdemesiniń mańyzdy bóligi egin egýdi, aýyl sharýashylyǵy salasyn damytýdy jáne azyq-túlik qaýipsizdigin qamtamasyz etý maqsatynda shaǵyn jáne orta sharýa qojalyqtaryn qoldaýǵa qatysty boldy. «Qarapaıym zattar ekonomıkasy» baǵdarlamasy boıynsha 100 mlrd teńge kólemindegi kómek jáne jylyna 5%-dyq mólsherlememen 70 mlrd teńge kólemindegi kómek jaqsy-aq. Biraq biz bul qoldaý sharalary naqty sektor úshin qanshalyqty qoljetimdi bolatynyna alańdaımyz. Kvazımemlekettik sektordaǵy birqatar sybaılas jemqorlyq janjaldarynan keıin kommýnıster daǵdarys jaǵdaıynda qarajat pen materıaldyq resýrstardy bólý óte aıqyn bolýy kerek dep sanaıdy! Ekonomıkanyń naqty sektoryndaǵy jumysshylardyń kvazımemlekettik damý ınstıtýttary men jergilikti atqarýshy organdarǵa degen senimin qalpyna keltirý qajet. Osyǵan baılanysty kommýnıster túrli yntalandyrý sharalary týraly sheshim qabyldanatyn ártúrli komıssııalar men komıtetterge óz ókilderin jiberýge daıyn!

Qazaqstan Kommýnıstik halyq partııasy Memleket basshysynyń memlekettik qoldaý sharalary qazirgi jaǵdaıǵa tolyq sáıkes keledi dep sanaıdy. Kommýnıster memlekettik áleýmettik saıasat Qazaqstannyń Konstıtýtsııadaǵy áleýmettik memleket bolýǵa úmittendiretin normaǵa jaqyndaǵanyn qoldaıdy. Biz daǵdarys jaǵdaıynda kóptegen damyǵan ekonomıkalardyń ózinde áleýmettik kepildikter qysqartylatynyna kýá bolyp otyrmyz: medıtsınalyq saqtandyrý polısi joıyldy, áleýmettik kepildikter tómendetildi. Biraq Qazaqstan konstıtýtsııalyq normalardy ustanyp, halyqqa jáne ekonomıkanyń naqty sektoryna memlekettik qoldaýdyń sany men sapasyn arttyrady! Bul úshin saıası erik-jiger men resýrs jetkilikti. Biz barlyq qazaqstandyqtardy qazirgi qıyn kezeńde birlik pen jaýapkershilik tanytýǵa shaqyramyz. Biz barlyǵymyz birge bolǵanda ǵana pandemııaǵa, jahandyq ekonomıkalyq daǵdarysqa jáne aldaǵy qıyndyqtarǵa qarsy tura alamyz!


Bizdiń kanalymyzǵa jazylyńyz:

Bólisińiz:
Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Gúlmıra Alıakparova
Gúlmıra Alıakparova
954-059
REDAKTOR
Erbol Janat
Erbol Janat
954-059
REDAKTOR
Janıbek Amangeldı
Janıbek Amangeldı
954-059

MURAǴAT