Qıyndyqqa tap bolǵan elordalyqtardyń áleýmettik kartasy jasalyp jatyr

NUR-SULTAN. QazAqparat – Elordada ómirlik qıyn jaǵdaıǵa tap bolǵan azamattardy anyqtaý maqsatynda árbir turǵynnyń áleýmettik kartasy jasalyp jatyr, dep habarlaıdy QazAqparat tilshisi.

Bul týraly qala ákimi Altaı Kólginov ákimdik májilisinde aıtty.

Úkimettiń keńeıtilgen otyrysynda júktelgen mindetterdiń qalaı júzege asyrylatynyn qala aktıviniń aldynda baıandaǵan ákim elordalyqtardyń áleýmettik kartasyn jasaý jobasyna toqtaldy.

«Ómirlik qıyn jaǵdaıǵa tap bolǵan azamattardy anyqtaý maqsatynda 1 sáýirden bastap astananyń árbir turǵynyna áleýmettik karta ázirlenýde. Ásirese áleýmettik az qamtylǵan, kópbalaly otbasylardy, jalǵyzbasty analardy jáne múgedek bala tárbıelep otyrǵan otbasylarǵa erekshe kóńil aýdarýymyz qajet», - dedi ol.

Altaı Kólginovtiń aıtýynsha, 5 209 otbasyǵa jańa formattaǵy ataýly áleýmettik kómek retinde 944,8 mln teńge tólengen.

«Máseleniń ekinshi jaǵy da bar. Prezıdent masyldyq sana oıanyp, azamattardyń jalǵan ajyrasýy kóbeıgenin atap ótti. Baqtııar Mákenuly, osyndaı faktilerdiń aldyn alý sharalaryn kúsheıtý qajet. Ataýly áleýmettik kómek shynymen de muqtaj adamdarǵa berilýi kerek», - degen shahar basshysy jyl basynan beri qala aýmaǵynda 9 200-den astam jańa jumys orny ashylǵanyn aıtty. 

Sondaı -aq, jyl sońyna deıin «Eńbek» memlekettik baǵdarlamasy arqyly 11 myńnan astam adamdy jumyspen qamtý josparlanǵan.