Keıbireýler «Qazaqstan halqyna» qorynan toı jasaýǵa, úı alýǵa jáne nesıesin tóleýge kómek suraǵan
2022 jylǵy 9 aqpan 11:56

Keıbireýler «Qazaqstan halqyna» qorynan toı jasaýǵa, úı alýǵa jáne nesıesin tóleýge kómek suraǵan

NUR-SULTAN. QazAqparat - Qazaqstanhalqyna.kz saıty iske qosylǵannan beri «Qazaqstan halqyna» qoryna 13 myńnan astam ótinish kelip túsken. Jalpy, búginde Qorda 115 mıllıard teńgeden astam qarajat jınaqtalǵan. Shuǵyl áreket etýdi talap etetin máseleler boıynsha saraptamalyq komıtetter jumys istep tur, dep habarlaıdy QazAqparat.

Sonymen qatar, saıt pen áleýmettik jelidegi messendjerlerge úı, kólik satyp alý, nesıe jáne basqa da qarjylyq zaımdar boıynsha mindettemelerdi tóleý, otbasylyq is-sharalar men merekelik sharalardyń qarajatyn óteý týraly ótinishter áli de túsýde.

Eske salaıyq, qamqorshylyq keńesi «Qazaqstan halqy» qorynyń negizgi mindetterin kórsetetin tujyrymdamany bekitti.

Osylaısha, qujatqa sáıkes, qordyń qyzmeti bolashaqta aýrýlardyń jáne múgedektiktiń yqtımal damýyn boldyrmaý maqsatynda sábılerge medıtsınalyq qyzmet kórsetýdi damytýǵa jáne onyń qoljetimdiligin arttyrýǵa járdemdesýge, sport jáne bilim berý ınfraqurylymy, sondaı-aq balalarǵa arnalǵan basqa da áleýmettik mańyzy bar qyzmetteriniń qoljetimdiligin arttyrýǵa baǵyttalǵan.

Sondaı-aq, qor múgedek, naýqas nemese áleýmettik beıimdelý problemalary bar balany asyrap alǵan, qorǵanshylyq nemese patronattyq tárbıeni uıymdastyrǵan otbasylarǵa kómek kórsetýmen jáne az qamtylǵan otbasylardaǵy balalarǵa kómek kórsetý úshin mekteptermen ózara is-qımyl jasaýmen aınalysady.

Sonymen qatar, tizimge Qazaqstannyń aýmaqtyq tutastyǵy men qaýipsizdigin qorǵaý nemese adamdardyń ómirin saqtap qalý jáne zardap shekken turǵyndarǵa kómek kórsetý kezinde qaıtys bolǵan nemese aýyr jaraqat alǵan quqyq qorǵaý organdary, arnaıy organdar, UQK qyzmetkerleriniń otbasylaryna, áskerı qyzmetshilerine, tótenshe jaǵdaılar kezinde zardap shekken adamdarǵa qoldaý kórsetý kiredi.

«Bul qyzmet baǵyttaryn qamqorshylyq keńes bekitti, al basqa salalar qor qyzmetindegi basym baǵyttarǵa jatpaıdy. Sondaı-aq, biz azamattardyń qarjylyq problemalary bolýy múmkin ekenin túsinemiz. Alaıda bul máselelerdiń barlyǵyn Qor sheshe almaıdy. Sondyqtan tujyrymdamada kórsetilgen qyzmet baǵyttaryn muqııat oqyp shyǵýyńyzdy suraımyz», - dedi «Qazaqstan halqyna» qorynyń resmı ókili Álibek Ábdilov.
Seriktester jańalyqtary

Jańalyqtar

Úrdis

MURAǴAT