Keı aýylda ınternettiń álsiz ekenin moıyndaımyz – Baǵdat Mýsın

NUR-SULTAN. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın jyl sońyna deıin 4 137 aýyl ınternetpen qamtylatynyn jetkizdi, dep habarlaıdy QazAqparat tilshisi.

Aıta ketsek búgin palatada Salyq kodeksine túzetýler engizý máselesi qaralǵan bolatyn. Depýtattardyń pikirinshe, atalmysh zań jobasy aıasynda aýyldaǵy ınternet máselesin uıaly baılanys operatorlary úshin preferentsııalar esebinen sheshýge bolady.

«Senatorlar baılanys operatorlary radıojelilerdi qoldanǵany úshin tóleıtin tólemniń jyldyq mólsherlemesin 90 paıyzǵa tómendetýdi usynyp otyr. Mundaı jeńildikti alý úshin baılanys operatorlary osydan únemdelgen qarajatty birinshi kezekte aýyldardy keń jolaqty ınternetpen qamtamasyz etýge jumsaý kerek. Bul – Memleket basshysynyń aýmaqtardy teńgerimdi damytý tapsyrmasymen baılanysty mindet», - dedi otyrysta Senat spıkeri Máýlen Áshimbaev.

Bul máselege baılanysty Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın jeńildik alatyn baılanys operatorlaryna naqty qandaı mindettemeler artylatynyn aıtyp berdi.

«90 paıyz jeńildik – shartty oryndap, artylǵan aqshasyn aýyldy eldimekenderdi aýqymdy ınternetpen qamtamasyz etý jumsaıtyn baılanys operatorlaryna ǵana beriledi. Bul mindettemeler oryndalmasa radıojıililik spektrine degen ruqsatty «Baılanys týraly» qazirgi zańnamaǵa sáıkes qaıtaryp alýǵa bolady. Osy usynystardy talqylaý barysynda da atalmysh baǵytta ilgeri qadamdy jasap úlgerdik. Biz operatorlar osy jyldyń shilde aıynan bastap-aq óz qarajaty esebinen jáne kooperatsııalarǵa birigip, halqy 250 adamǵa deıingi aýyldy eldimekenderge ınternet tartý jumystaryn bastap ketti. Osylaısha «Nur Otan» partııasynyń saılaý aldyndaǵy ýádesin oryndap jatyrmyz. Bul degenimiz – jyldyń sońyna deıin ınternetpen qamtylatyn 4 137 aýyl. Alaıda aldaǵy bes jylda bul baǵytta jumsalatyn qarajat sol aýyldardaǵy ınternettiń sapasyna arttyrýǵa jumsalady. Sebebi belgili bir aýyldy eldimekender men aýmaqtarda ınternettiń álsiz ekenin moıyndaımyz», - dedi ol.

Baǵdat Mýsın Senatta búgin qaralǵan normalar aldaǵy bes jylda bul máseleni birjolata sheshýge múmkindik beretinin jetkizdi.