+7 (701) 759 90 19
USD 377.19 EUR 408.99
RUB 5.93 CNY 54.02
Jańalyqtar

Keste tigýden 28 patent alǵan kelinshek  - Sheteldegi qazaq tildi BAQ-qa sholý

2020 jylǵy 18 qańtar 10:55
Bólisińiz:
Keste tigýden 28 patent alǵan kelinshek  - Sheteldegi qazaq tildi BAQ-qa sholý

NUR-SULTAN. QazAqparat - «QazAqparat» HAA ádettegideı sheteldegi qazaq tilinde taraıtyn aqparat kózderine aptalyq sholýyn usynady.


Muz-músinder jarysynda Mońǵolııanyń «Meni qutqaryńyz!» jumysy erekshe boldy -

13 qańtarda 25-shi halyqaralyq qarly músinder konkýrsy Harbın qalasynda ótti. Álemdik saıysqa 10 el men ólkelerden 25 komanda qatysty, dep habarlaıdy kazakh.people.com.cn .

Bul halyqaralyq jarysta Indonezııadan kelgen saıyskerler toby «Balıdaǵy jas jubaılar» qar músinimen sheberliktiń eń úzdik marapatyn jeńip aldy. Áıtse de, kópshiliktiń erekshe yqylasyna bólengen Mońǵolııa komandasynyń «Meni qutqaryńyz!» atty músindik jumystary bolyp otyr. Mońǵolııa komandasynyń jumysy birinshi orynǵa laıyq dep baǵalanǵan. «Mońǵolııa komandasynyń saıyskerleri daıyndaǵan «Meni qutqaryńyz» qar músini Avstralııadaǵy orman órtinde aýyr zardap shekken kóptegen jabaıy janýarlar jóninde eken. Maǵynasy qorshaǵan ortany qorǵaý», dep jazady qytaılyq aqparat kózi.

Atalǵan halyqaralyq básekede Qytaıdaǵy Heılýntszıan zamanaýı óner ınstıtýtynyń konkýrsqa qatysýshylary «Álemdi saqtańyz» atty qar músinimen ekinshi júldeni jeńip alsa, Reseıdiń «Vladıvostok» komandasynyń saıyskerleri «Karnaval-maska sherýi» qar músinimen úshinshi oryndy ıelengen. Ońtústik Koreıanyń Mıkasa qalasynan kelgen «Samcheok City» komandasynyń saıyskerleriniń «Baıaý estetıka» qar músini arnaıy syılyqqa ıe boldy, dep jazady qytaılyq BAQ.


Shahmat mamandyq retinde oqytylady - TRT


Túrkııanyń Dýzje ýnıversıtetinde sport ǵylymdary fakýltetinde shahmat «mamandyq bilimi» retinde oqytylady, dep habarlaıdy Túrkııa Radıo Televızııa portaly.

Aqparat kóziniń deregine súıensek, Dýzje ýnıversıteti sport ǵylymdary fakýltetiniń jattyqtyrýshylyq kafedrasynda stýdetter shahmatty «mamandyq bilimi» retinde tańdaı alady. 4 bilim berý maýsymynda 224 saǵat shahmat sabaǵyn alady, 196 saǵat shahmat jattyqtyrýshylyǵy baqylaýy men tájirıbesinen ótedi.

«Shahmatty mamandyq retinde tańdaǵan stýdentter bilim alǵannan keıin Túrkııa Shahmat federatsııasynan «3-shi dárejeli shahmet jattyqtyrýshysy qujatyn alady», dep jazady túrkııalyq BAQ.


Qaba aýdanynda 10 myńnan astam kelinshek keste tigedi - «Aǵajaı-Altaı» portaly

Qytaıdyń Qaba aýdanynda on saýsaǵynan óner tamǵan kesteshi qyzـkelinshek kóp, biraq, kesteden 28 patent kýáligin alǵan tek Baqytgúl Yǵısaqyzy ǵana. Jaıylma aýyly Aqtóbe qystaǵyndaǵy ózge kesteshi áıelderi Baqytgúldiń talantyn da moıyndaıdy, dep jazady «Aǵajaı Altaı» portaly.

Onyń eki túrli sebebi bar. Birinshi, Baqytgúldiń kesteshilik ónerinde ismerligimen birge kestesi sheber jobalanǵan. Endi biri, jobalaǵan kestesiniń bilim menshik quqyǵyn zańdyq qorǵaý tanymy kúshti, dep jazady altxw.com.

Qytaılyq BAQ-tyń málimetinshe, Baqytgúl ózgeshe jobalaǵan kestelerine patent quqyǵyn alǵandyqtan onyń kesteleriniń «kóshirme» nusqasy bazardan kezikpeıdi. Qysqasy, onyń árbir tikken kestesiniń jobasy bir ózine ǵana tıesili. Sol sebepti, kóptegen adamdar Baqytgúldi arnaıy izdep kelip tapsyrys berip, qajetti buıymyn tikkizedi. Ásirese, uzatylatyn qyzdar onyń kesteli buıymdarymen otaýyn bezendirýdi ádetke aınaldyrǵan. Óıtkeni, olar Baqytgúldiń kestelengen buıymdary eshkimge uqsamaıtyn úlgimen tigiletinin biledi.

Baqytgúl «ózim jobalaǵan kesteniń úlgisi nege ózimmen esh qatysy bolmaýy kerek?» dep oılap, Altaı aımaqtyq ǵylym-tehnıka mekemesine baryp, kásibı qyzmetkerlerden keńes alyp, óziniń keste jobasy úshin patentke ótinish etýi kerek ekendigin biledi. Sóıtip, ol ózi jobalaǵan keste órnekterine 2013 jyly tuńǵysh ret patenttik kýálik aldy. Sodan beri Baqytgúl keste jobalaryn 28 ret patenttegen.

Ol kesteli buıym jónindegi túsinigin, sondaı-aq patent quqyǵyn alýdyń mańyzdylyǵyn kesteshi qurbylaryna únemi aıtady. Qazirge deıin Baqytgúl 1000-nan astam kesteshi tárbıelegen.

«Men qazaqtyń kesteshilik ónerin jalǵastyrýshynyń birimin. Qolmen keste tigý ońaı emes. Mysaly, 1,8 metr uzyndyqtaǵy tósek japqyshty tigýge jarty aıdan astam ýaqyt ketedi, mashaqatty bolǵanymen tikken buıymy kesteshiniń isimerligin áıgileıdi. Patentke ótinish etý óziń jobalaǵan buıymdy qorǵaý, onan da mańyzdysy dástúrli qolónerge kórsetken izet-qurmetiń», deıdi Baqytgúl Yǵısaqyzy.

Sondyqtanda jylyna birneshe keste úgisin patenttetý onyń ómir daǵdysyna aınalǵan.

«Qazir Qaba aýdanynda keste tigetin 10 myńnan astam áıel bar. Keste ónimderinen túskıiz, sandyq qap, kıimـkeshek, áshekeı buıymdary qatarly 50-neshe túri bar. Sonymen birge, Qaba aýdany kesteshilik kooperatıvin qurý, kýrs ashý qatarly tásilder arqyly ulttyq ónerden markalyq brend jasap, kesteshilik kásibin damytýda», dep túıindeıdi «Aǵajaı-Altaı» portaly.

Cporttyq sharalar aımaqtyń 80 jyldyǵyna arnalady - kaznews



Osy aptada kaznews.mn aqparattyq portalynda, Baıan-Ólgıı aımaǵynyń Dene shynyqtyrý, sport basqarmasynyń bastyǵy Qaınar Qaısanaıulymen ótkizgen suhbaty jaryq kórdi.

Suhbatta Baıan-Ólgıı aımaqtyq sport basqarmasynyń basshysy Qaınar myrza qazaqtar kóp qonystanǵan óńirdiń ótken jylǵy jáne odan burynǵy ýaqyttardaǵy sport salasynda jetken jetistikteri týraly keńinen toqtalǵan. Atap aıtar bolsaq, 2019 jyly jalpy sport túrlerinen eresekter arasynda 17, jastar jáne jasóspirimder arasynda 21, jospardan tys 20-daı, barlyǵy 60-taı sporttyq sharalar uıymdastyrylǵan eken. Aımaqtyq Dene shynyqtyrý, sport basqarmasynyń bastyǵy bul áńgimesinde ózderinde bar sport sektsııalary týraly da aıtqan. «Aımaǵymyzda mońǵoldyń ulttyq kúresi, basketbol, voleıbol, boks, ziltemir, taekvondo, karate, dzıý-do, ústel tennısi, shaǵyn fýtbol, sondaı-aq dene shynyqtyrý baǵytyndaǵy fıtnes zaldary qatarly 13 túrli sektsııa turaqty jumys jasaıdy», deıdi Qaınar Qaısanaıuly.

Atalǵan suhbattyń sońy B aıan-Ólgıı aımaǵynyń sportyna úles qosyp kele jatqan beıresmı odaq, federatsııalardyń úlesi erekshe ekenin aıtýmen aıaqtalǵan. «Bizdiń aımaǵymyzda búgingi málimetpen 30-ǵa tarta sporttyq beıresmı odaq, federatsııalar jumys isteıdi. Sondyqtan, osy uıymdardy basqarýshy azamattardyń aty-jónin túgendep, jeke-jeke alǵys aıtýǵa bul suhbatymda múmkindik az... Sportqa degen janashyrlyqtary úshin bárine de rızashylyǵymdy, aqjarma alǵysymdy bildiremin!» dep oıyn túıindeıdi aımaqtyq sport basqarmasynyń basshysy Q. Qaısanaıuly.

Ózbekstanda jýrnalıst qyzmetine kedergi keltirgeni úshin jaýapkershilik kúsheıtilmek - «ÓzA» aqparattyq agenttigi


Qazirgi tańda qoǵamǵa jyldam ári shynaıy aqparat taratý men oqıǵanyń kelip shyǵý saldaryn anyqtaýda jýrnalıstke kedergi jasaý faktileri búkil álemde oryn alyp jatqan soraqy jaǵdaı ekeni belgili. Ózbekstan úkimeti osy jaǵdaıdy boldyrmaý jáne jýrnalısterdiń mártebesin kótermeleý men olar quqyǵyn qorǵaý maqsatynda «Olıı Majlıstiń» Ákimshilik jaýapkershilik týraly kodeksine tolyqtyrýlar engizý týraly zań jobasy kópshiliktiń talqylaýyna jarııalady. Bul týraly ÓzA aqparat agenttigi jazady.

«Ataýly qujat boıynsha, 1994 jyl 22 qyrkúıekte qabyldanyp 2015-XII-sandy Zańmen bekitilgen Ózbekstan Respýblıkasynyń Ákimshilik jaýapkershilik týraly kodeksine birqatar túzetýler men qosymshalar engiziledi. Atap aıtqanda, 197-5 bappen tolyqtyrylyp, jýrnalıstik qyzmetke kedergi jasaý, aqparat taratýyna nemese taratýdan bas tartýǵa májbúrleý, akkredıtteýden bas tartýǵa nemese akkredıttatsııany orynsyz jaramsyz etýge, jýrnalıstiń suraq qoıýy jáne qajetti aqparatty alý quqyǵyn buzýǵa, jýrnalıstiń materıaldary men jumys qural jabdyqtaryn zańsyz alyp qoıý negizderi bazalyq esepteý mólsheriniń eki den bes eselengen mólsherinde aıyppul salýǵa ákep soǵady. Eske sala ketsek, Olıı Majlıstiń Zań palatasy depýtaty Rasýl Kýsherbaev bul máselede asa kóńili tolmaıynyn jetkizip, «jýrnalısterge qysym kórsetken kisi zań aıasynda jazalanýy tıis, keshirim suraýmen qutylyp ketýi kerek emes» dep aıtqan edi», - delingen agenttik saıtyndaǵy aqparatta.



Bizdiń kanalymyzǵa jazylyńyz:

Basty sózder: BAQ,
Bólisińiz:

Avtor:

Beısen Sultan

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Erbol Janat
Erbol Janat
954-059
REDAKTOR
Janıbek Amangeldı
Janıbek Amangeldı
954-059
REDAKTOR
Aıdar Ospanalıev
Aıdar Ospanalıev
954-059

MURAǴAT