Kelesi jyly oblys ákimderiniń jumys baǵyty ózgeredi - Aıdos Sarym
2022 jylǵy 22 maýsym 17:00

Kelesi jyly oblys ákimderiniń jumys baǵyty ózgeredi - Aıdos Sarym

NUR-SULTAN. QazAqparat – Konstıtýtsııalyq reformadan keıin Qazaqstan zańnamasynda qandaı ózgerister bolady? QR Parlamenti Májilisiniń depýtaty Aıdos Sarym osy jóninde pikir bildirdi, dep habarlaıdy QazAqparat tilshisi.

«Qazirgi tańda 30-ǵa jýyq zań daıyndalyp jatyr. Onyń ishindegi ekeýi - buryn-sońdy bolmaǵan jańa zańdar. Birinshisi - Konstıtýtsııalyq sot týraly. Onyń kontseptsııasy bekitilip, zańgerler jazýǵa kiristi. Atalǵan qujatta qamtylýy tıis talaptar kóp. Máselen, sýdıalardyń sheshim qabyldaý baǵyttary, zańdy kúshine engizý ýaqyty tóńiregindegi detaldar tolyq qamtylady. Óıtkeni ol azamattardyń quqyǵyn qorǵaıtyn, bılik tarmaqtary arasynda bolyp jatqan daý-damaıdy sheship beretin ınstıtýt bolýy tıis. Ekinshi ázirlenip jatqan jańa zań - Joǵary arbıtrajdy palata. Bul jańa Konstıtýtsııalyq ınstıtýt. Al jergilikti ózin-ózi basqarý tóńiregindegi zańdardy kútip otyrmyz. Bul salada da kóp tolyqtyrýlar men ózgerister bolady. Konstıtýtsııanyń birinshi jáne ekinshi baby qoǵam men azamatqa arnalǵan. Onyń ishinde áleýmettik máseleler aıtylady. Konstıtýtsııa bolsa 9 taraýdan turady. Sonyń eki taraýy qoǵam men azamat desek, qalǵan 7 taraý bılikke qatysty. Sol 2 taraý durys jumys isteý úshin qalǵan 7 taraý bir-birimen baılanysyp, astasyp jatýy kerek. Tek sol ýaqytta bılik mehanızmderi durys jumys isteı bastaıdy», - dep pikir bildirdi Aıdos Sarym.

Sonymen qatar depýtat tıisti zandar qaı ýaqytta tolyq qabyldanyp, kúshine enetinin aıtty.

«Konstıtýtsııalyq ózgerister qabyldanǵan kezde keńestiń naqty talaby bolǵan. Qaı organ qaı ýaqyttan bastap jumysqa kirisedi degen. Osyǵan sáıkes, Konstıtýtsııalyq sot keler jyldyń 1 qańtarynan bastap iske qosylady. Oǵan deıin tártipteri men erejeleri qabyldanýy qajet. Jalpy Konstıtýtsııalyq ózgerister negizinde qabyldanatyn zańdardyń barlyǵy kelesi jyldyń basynda kúshine enedi. Biraq Májilis merzimi aıaqtalǵansha bolady. Keıingi saılaý jańa Konstıtýtsııa boıynsha ótedi», - dep atap ótti Aıdos Sarym.

Saıasattanýshy Parlamenttiń róli týraly Ata zańǵa engiziletin ózgerister zań qabyldaý men maquldaý protsessin tezdetýge yqpal etetinin málimdedi.

«Zańdardyń jıi qabyldanyp, ózgerip otyrýy qalypty protsess. Al qujatta bolatyn qatelikter men jetkiliksiz zertteý - ol zańgerlerdiń kinási. Ózgergen Kostıtýtsııa qos palataǵa zańdardyń tez arada maquldap, az ýaqyt aralyǵynda qoldanysqa engizýge múmkindik beredi. Meniń oıymsha, búginde elimizde jaman zańdar qabyldanyp jatqan joq», - dedi ol.

Depýtat paıymynsha, keler jyldan bastap respýblıkalyq mańyzy bar qalalar men oblys ákimderiniń jumys baǵyty ózgeredi. Depýtat jańadan qurylǵan úsh oblystyń ákimi ózgergen Konstıtýtsııa boıynsha saılanǵanyn atap ótti.

«Prezıdent oblys ákimine úmitker keminde eki adamnyń kandıdatýrasyn usynady. Ol ekiden de kóp bolýy múmkin. Keıin aımaqtyń máslıhat depýtattary jınalys uıymdastyrady. Onda úmitkerler ózderiniń baǵdarlamasyn tanystyryp, sol oblystaǵy máselelerdiń sheshý joldaryn kórsetýi tıis. Osy jumystardyń nátıjesinde daýys berý arqyly ákim saılanady. Qazir ımperatıvti mandat degen enip jatyr. Mysaly siz óz aýdanyńyzdyń ákimin saılasańyz, onyń taǵdyryn sheshetin ózińiz bolýyńyz kerek. Halyq saılasa, halyq ákimdi qyzmetten alyp tastaı alady. Bolashaqta Qazaqstanda 20 ákimniń jumysy ózgeredi. Olar qazirgideı aýdan basshylaryn shaqyryp alyp esep surap, túrli mindetter júkteı almaıtyn bolady. Óńir basshysy tek zańnamalardyń oryndalýyn qamtamasyz etip, bıýdjettiń maqsatty jumsalýyn qadaǵalap otyrady. Qazir oblys ákimi jergilikti «Qudaı» sııaqty. Endi ol dáýirden ótetin kezeń keldi. Óıtkeni aýdandarda otyrǵan ákimderdiń barlyǵy saılanbaly. Olarǵa ne tapsyrma bere alasyń?! Aýdan basshylary óz turǵyndarynyń máselesin sheshýmen aınalysýy kerek», - dedi depýtat

Aıdos Sarymnyń aıtýynsha, mundaı júıe Frantsııada bar. Ol elde iri qalalardyń ákimderin prezıdent taǵaıyndaıdy. Al onyń qaramaǵyndaǵy eldi meken basshylary - saılaý arqyly qyzmetke kelgender. Sondyqtan iri qala ákimi tek sol jerdegi memleket basshysynyń resmı ýákili retinde qyzmet atqarady.


Seriktester jańalyqtary

Jańalyqtar

Úrdis

MURAǴAT