«QazMunaıGaz» jyl saıyn 1000-ǵa jýyq jańaózendik oqýshyny elimizdegi úzdik mektepter men kolledjderde oqytpaq
2022 jylǵy 2 shilde 10:45

«QazMunaıGaz» jyl saıyn 1000-ǵa jýyq jańaózendik oqýshyny elimizdegi úzdik mektepter men kolledjderde oqytpaq

NUR-SULTAN. QazAqparat - «Ózenmunaıgaz» AQ «QazMunaıGaz» ulttyq kompanııasynyń qoldaýymen jáne memlekettik organdarmen birlesip «Jarqyn bolashaq» jobasyn iske qosady.

Atalǵan áleýmettik jaýapkershilik joba aıasynda Jańaózendegi daryndy oqýshylardyń elimizdiń úzdik mektep-ınternattary men kolledjderinde oqýyna qoldaý kórsetiledi. Osy jyldan bastap ári jyl saıyn 1000 jýyq jańaózendik jastar naqty ǵylymdardy tereńdetip oqytýdan bastap shyǵarmashylyq jáne sporttyq talanttaryn damytýǵa deıin túrli baǵyttar boıynsha suranysqa ıe mamandyqtardy oqýǵa múmkindik alady. Joba 2025 jylǵa deıin josparlanǵan. Osy kezeń ishinde 4 myńǵa deıin oqýshy bilimderin jetildire almaq.

«Jarqyn bolashaq» jobasynyń maqsaty – sapaly bilim alýǵa qoljetimdilikti qamtamasyz etý, oqýshylardyń bilim sapasyn, sondaı-aq olardyń eńbek naryǵynda básekege qabilettiligin arttyrý.


Joba osy jyly 2 baǵyt, atap aıtqanda oqýshylardyń akademııalyq utqyrlyǵy jáne suranysqa ıe mamandyqtar boıynsha kolledjderde oqýy boıynsha iske qosylady. Bul rette respýblıkalyq mamandandyrylǵan mektep-ınternattarda oqý úshin memlekettik kvotalar bólý qarastyrylýda. Al osy mektep-ınternattarda jáne kolledjderde aqyly negizde oqý Ulttyq kompanııa esebinen júrgiziledi. Oqý aqysymen qosa, turatyn oryny, jolaqy jáne basqa da shyǵyndar óteledi.

Jańaózendik oqýshylar Qazaqstannyń túrli qalalary men aımaqtaryndaǵy mektep-ınternattar men tehnıkalyq jáne kásiptik bilim berý mekemelerin (kolledjder) tańdap, irikteýden óte alady. Bilim berý mekemeleriniń arasynda Aqmola oblysyndaǵy daryndy balalarǵa arnalǵan IQanat High School of Burabay mektep-pansıonaty, QR iri qalalaryndaǵy fızıka-matematıka baǵytyndaǵy joǵary bilikti mektep-ınternattar, sport baǵytyndaǵy mektepter (olımpıadalyq rezerv mektepteri), QR iri qalalaryndaǵy «Jas maman» baǵdarlamasy boıynsha jańǵyrtylǵan kolledjder, óner salasyndaǵy kolledjder jáne áskerı mektepter jáne «Jas ulan» kolledjderi bar. Mektep-ınternattarǵa qabyldaý jáne kolledjderge túsý jasy oqý oryndarynyń ishki erejelerimen retteledi.

Bul rette oqý oryndarynyń bilim berý júıesi, onyń ishinde jaıly jataqhana, tamaqtaný obektileri, medıtsınalyq qyzmet, bilikti psıhologııalyq-pedagogıkalyq jáne basqa da qyzmetter barlyq talapqa saı bolýy tıis.

Baǵdarlamaǵa seriktes bolǵan mektepter men kolledjderdiń arnaıy komıssııalary Jańaózendegi balalar arasynan aldyn ala irikteý jumystaryn júrgizedi. Sondaı-aq mektep oqýshylary men olardyń ata-analaryn oqý baǵdarlamalarymen tanystyrý maqsatynda bilim berý mekemeleriniń jármeńkeleri ótkizilmek.

Aıta ketsek, baǵdarlamaǵa qatysatyn mektepter men kolledjderdiń tizimi aldaǵy ýaqytta keńeıtiletin bolady. Sondaı-aq joba aıasynda kolledj túlekterin óńirlerde jumysqa ornalastyrýdy qamtamasyz etý qolǵa alynbaq.


Seriktester jańalyqtary

Jańalyqtar

Úrdis

MURAǴAT